طرقات على باب الزمن تأتي مع مهب ريح الذكريات
فتتركنا بمواجهة الطارق الآتي
لتفتح جروحاً قد مرَّ عليها الدهر
وتدفعنا نحو مستقبل مجهول
كلنا مجتمعين بالصف ننتظر استلام النتائج ومن عندها راح نعرف ندخل بكلوريا لو لا. أباوع للبنات الوجوه مگلوبة مخطوف لونهم وكأنما راح يعلنون موعد إعدامهم مو إعلان نتائجهم. الوحيدة أني مسيطرة وواثقة من نفسي. كانت المدرسة ست فوزية تعلن بالأسماء وأني أضحك على البنات وأخمنلهم منو الناجحة ومنو الي ماتدخل بكلوريا. حسيت على إيد لكزتني التفتت لكيت ندى صديقتي، همست بصوت ناصي حتى ماتسمعنا المدرسة.
ندى: لج ريم ذبي العلج لا تشوفج المدرسة وتطردج من الصف استري علينا. هزيت كتفي بلا مبالاة: كون هي صحيح بايعة روحها خليها تجرب تطردني وتشوف.
ندى: يلعن بليسج شكد صلفه ولج اني راح أموت بدمي من الترقب والخوف وانتي ولا هامج الموضوع. ريم: يعني شنو تريدين اسوي الطم؟ حبي اني ادخل بكلوريا غصباً عن الكل شنو نسيتي اني ريم؟ ندى: هنيالج ضامنة النجاح.
صاحت أسماء البنات بالتسلسل، منهم الفرحانات بالنتيجة ومنهم الي كعدوا ينحبون ومنهم الي كعدوا يجمعون ويطرحون بلكي يحصلون درجة زايدة. وكان يوصلني الدور وأسمع اسمي صاحت: ريم محمد... كمت من رحلتي بكل ثقة عبالك ملكة راح يكرموها من زود الثقة. وصلت يم المدرسة ومديت ايدي حتى اخذ النتيجة، وكان تبشرني ست فوزية: راسبة بست دروس ياخاتونة. عود سلمينا على عمج مؤيد بطريقج.
اسمع أصوات القرودة صديقاتي من وراي: طننننننننن. أخذت النتيجة وابتسمت بكل فخر ورحت كعدت برحلتي مثل البرنسيس رافعة راسي ويا جبل ما يهزك ريح.
ندى: لا وواثقة من نفسها ولا عبالك. جانت تحجي وياي وتباوع هي والبنات لنتيجتي ودرجاتي. رؤى: يبووي ونوب تعالوا شوفوا الدرجات شلون تحفة الله عليج ريم شنو جنتي تسوين طول السنة؟ التفتت عليهن بكل كبرياء: رجاءً ما اسمحلكم تحجون على درجاتي ترة كل درجة بهاي الدروس اني تعبانة عليها لا عبالكم اني اجيب هيج درجات بسهولة.
ندى: لا والنعم منج ما قصرتي بس كليلي أينشتاين شيصير من عندج اكيد على هاي الدرجات الخارقة مو اي واحد يكدر يحصلهم. صاحت اسم ندى وراحت استلمت النتيجة أباوع عليها ضربت على وجها وحركت شفايفها انرسمت عليها كلمة يبوووو بدون صوت. اجتي وكعدت يمي خطية حتى هي كانت راسبة وماداخلة بكلوريا.
كعدت يمي وكالت: ياربي شسوي شكول لأمي من اروح؟ ريم: شنو تكولين يعني شصار؟ ندى جاوبت وهي مرتبكه وشفايفها ترجف: عفية سكتي ريم ما ناقصة برودج اني بورطة، المشكله شنو راح اسوي شنو اكول لنجاة اذا شافت النتيجة (كانت تقصد امها). ريم: بسيطة كوليلها ماما تكبرين وتنسيها ربي يعوضج بأخواني البقية. سكتت ندى شكلها ماتعرف شجاوبني بس هزت ايدها (تهي بهي).
خلصنا الوقت بين مد وجزر علمود النتائج، وناس تكول احتمال ينطون قرار دخول شامل وناس تكول لا تتأملون. وأنا جمعت الشلة وصرت اتفق على موعد الطلعة للمول. ندى بخذلان: بالنسبة الي لا تحسبون حسابي بالطلعة، بعد هاي النتيجة ما اتوقع الاهل يوافقون اطلع بعد لأي مكان. ريم: ندى حبيبتي لاتخافين ان شاء الله ماراح يصير شي. ندى: وليش ما اخاف يعني شنو فوك راسي ريشة مثلاً؟ ريم: لا حبيبي مو فوك راسج ريشة بس بالنهاية انتي بنتهم واكيد انتي اعز عليهم من النتيجة.
فرت ايدها وباستها وحطتها على كصتها وكالت: الحمدلله ياربي على نعمة العقل. بابا ريم اصحي حبيبتي انتي رجعتي للعراق العظيم لاعبالج بعدج برة. احنا مو عايشين بالخارج والام تجي لبنتها تواسيها وتوديها طبيب نفسي خاف اتاثرت من عرفت راسبة، لا حياتي انا امي المواساة عندها بالنعال ووين اليوجعج. رؤى: لا عوفيها هاي بعدها متأثرة بحياة الخارج وما مستوعبة الحياة هنا شلون ماشية.
دك الجرس وصارت وقت طلعتنا من المدرسه، طلعت اني صديقاتي للسايق وجان تمر يمنا سيارة نوع Camaro لونها اسود صاعد بيها شاب ما انتبهت على شكله. مر من يمنا وداس بانزين وارتفع صوت المحرك بصوت يجعر واني جفلت. ندى: فدييييييت هالصوت وراعيه غير اخرب على هيج سيارة. صبا: لج شوفي الشاب الي راكبها. رؤى: اي صدك اتذكرت ريم هذا الولد حجة وية اخوي حتى اتوسطله واحجي وياج يريد رقمج. يابختج ريم.
رفعت راسي وباوعت لصاحب السيارة وهزيت ايدي: اييييع عمة حتى عمة هذا شنو عبالك زرزور مبلل، لايكون هذا عندكم وسيم؟ ندى: على كيفيج عيني انطيج عيوني تشوفين بيهم بس صدك لو كالوها ينطي الجوز للماعنده سنون. ريم: لا حبيبتي خلي الجوز الج اني عني ميفيدني احب الفستق، اني الشاب اليعجبني لازم يكون رجال بمعنى الكلمة، اهم شي يشبه عمي مؤيد فديته لعمو حبيبي يخبل.
ندى: ها يعني تحبين السمر اممم.. اوووف الناس وين واني وين نسيت مصيبتي وباقية احجي ماخذة راحتي كأنما ما راسبة، هسة الكة امي منتظرتني ورة الباب تريد تعرف النتيجة ايد بيها حلويات وايد الثانية بيها السلاح الابيض نعال ابوية الجبير بس الله يستر. باوعت عليها مستغربة: يعني شنو يريد يصير شدعوة انتي هشكل خايفة؟ ندى: طبعا حقج انتي ما تعرفين العقوبات الي راح يفرضوها علية اهلي. ريم: شنو القضية ليش طولتيها وعرضتيها انتي بنتهم مو عدوتهم.
قطع كلامنا وصول السايق وودعت البنات وصعدت بالسيارة. وصلت للبيت وكان فارغ محد بي لاعمو مؤيد ولا عمة اسيا تعودت على هذه الحالة كلما ارجع ما الكة احد. دخلت للمطبخ وكالعادة لكيت بس ام فلاح، سألتني: هلا ريمة بشريني انطوج النتائج؟ جاوبتها بدون اهتمام: اي استلمت النتيجة وراسبة ما داخلة بكلوريا. غيرت الموضوع واتجهت للباب: خالة جهزي الغدة بين ما اغير ملابسي. ام فلاح: صار من عيوني دقيقتين وتلكين الاكل جاهز.
صعدت فوك لغرفتي وخلص اليوم وعمو وعمة ما رجعوا للبيت ونمت بدون ما ابلغهم عن النتيجة، أصلاً عادي عندي هذا الوضع. يوم ثاني الصبح كعدت من النوم ونزلت جوة واستقبلتني عمة اسيا: اكلج ست ريم انتي وتاليها وياج ماراح تحسين على نفسج يعني صدك مصختيها عاجبج وضعج كل سنة ترسبين واخوية يعوف شغله يظل يفتر يدور واسطات حتى ينجحون حضرة جنابج.
نفخت بضجر اوف معناها خالة ام فلاح بلغتها بالنتيجة. ريم: اهووو عمة من الصبح مستقبلتني هذا الاستقبال كولي صباح الخير. اسيا: منين يجي الخير وانتي كاعدة من النوم بعز الظهر وحضرتج ضاربة الكل بعرض الحايط ولاهامج احد. كانت عمة اسيا معصبة ومستمرة بدون انقطاع عبالك راديو وانفتح. واني واكفة اسمع لموشح الرزالة امسح على راسي المسكين الي صدع من اللغوة.
هسة الي يسمعها يكول هاي شكد حنينة على بنت اخوها اليتيمة وهي بالحقيقة ماعندها ذرة اهتمام وحنان الي، ما ادري ليش هشكل تعاملني احس عبالك كاطعة عليها ليلة عرسها بس احمد الله واشكره ان عيشتي مو عليها ربي يخليلي عمو مؤيد. ولو ما عمو مؤيد يحطلها حد لتصرفاتها واسلوبها الحقير وياية كان بس الله اليعلم شسوي بية. وخصوصاً هالايام حادة سنونها علية وعلى حظي المصخم البارحة استلمت النتيجة راسبة والحمدلله وكعت بلسانها وهي ما صدكت تلزم علية حجة. ريم: اوووف هسة خلصتي لو بعد شوية رزايل تضيفيها للقائمة؟
اسيا: هاي شنو حضرتج گاعدة تستهزئين؟ الظاهر ما عاجبج كلامي، صوج اخوية الي فسدج بالدلال وهاي النتيجة تصرفات طايشة ومستهترة. والله بعد ما اتحملها راح انفجر بيها. ريم: شلون بالله ماراح تسكتين اليوم صدك بزعت روحي، يعني شنو ترديني اسوي اكتل نفسي حتى ترضين؟ اسيا: انتي شكد صلفة وماتستحين كاعدة تلاسنين، بسيطة خلي يجي اخوية مؤيد واخليه يشوف شغله وياج لان وضعج بعد ما ينسكت عليه.
ريم: هسة انتي ليش معصبة نفسج؟ مسؤوليتي عمي حبيبي هو المتكفل بيها لتعبين روحج انتي، بعدين اريد افتهم شي واحد هو مستقبلج لو مستقبلي؟ باوعت لوجها صار احمر من الاعصاب. اسيا: ااااااخ لو اخوية مؤيد ينطيني صلاحية عليج لأكون عايدة تربيتج من اول وجديد واخليج تحلمين ترفعين عينج بعيني. جاوبتها ريم: والحمدلله عمو...
فاجئنا دخول عمو مؤيد للمطبخ، سلم علينا وعيونه تتنقل بينا. مؤيد: شكو ليش صوتكم واصل للشارع؟ ردت اجاوبه بس عمة اسيا سبقتني: الحمد لله اجيت بوكتك تعال شوف بنت اخوك شداتسوي. مؤيد: شبيها ريم؟ اسيا: الخاتونة راسبة وما داخلة بكلوريا، تعال اسمعها شلون تجاوبني بكل صلافة. باوع علية وسحب نفس عميق شكله جان مبين كلش تعبان: ريم عمو انتي ما ناوية تنتبهين لمستقبلج؟ ريم: عمو والله اني ادرس بس ماكو توفيق.
اسيا: منين يجي التوفيق اذا انتي اربعة وعشرين ساعة لو نايمة لو دياحة وية صديقاتج لو مكابلة النقال؟ مؤيد: عمو ريم كل مرة اسكت واكول خطية ما اكسر بخاطرها، بس ياعمو هسة الوضع اختلف وصار لازم تنتبهين لنفسج ولمستقبلج. رحت اقتربت عليه وبسته من خده وكتفه: اول شي تعال ارتاح شوية انت هسة راجع من الشغل. باوعت لعمة اسيا: الله يسامحج عمة يعني انتي ماتشوفين عمو حبيبي شلون راجع تعبان؟
اسيا: لو انتي صدك حنينة على عمج كان عالاقل نجحتي ووفرتي سالفة الواسطات. ريم: عمة ماله داعي لهذا حجيج، الموضوع ما يحتاج كل هاي الهوسة هسة عمو يتصل على صديقه يروح للادارة ويطلب منهم يدخلوني بكلوريا وكولشي ينحل. باوع علية بتعب: وانت ليش تكوليها هيج بكل بساطة؟ زين الى متى هشكل تبقين معتمدة على عمو؟ برأيج اذا رسلت صديقي راح ينحل الموضوع؟ ريم: اكيد ينحل همة بس خلي يدخلوني بكلوريا والله كريم.
مؤيد: زين وبعدين وبالبكلوريا من تدخلين منو ينجحج؟ هناك ماكو عمو مؤيد وواسطات كلكم سواسية. ريم: اوعدك عمو بس هالمرة وشوفني راح اشد حيلي واتعب نفسي. مؤيد: وشنو الجديد انا كل مرة اسمع هاي الجملة، واسكت بس هسة بعد ما اكدر اسكت لهنا وكافي، انتي لازم تنتبهين لنفسج ومنا ورايح تعتمدين على روحج. باوعت عليه متفاجئة وحسيت بالخذلان، شبي عمو متغير علية؟
مؤيد: استغفر الله، عمو ليش هاي الدموع؟ انا ما اريد منج شي غير بس تنتبهين لمستقبلج لان انا ما داي... انتبه لروحه وقطع كلامه ومسح وجهه التعبان: استغفر الله... احس يوم عن يوم الامور تتعقد اكثر مما انا متصور. جاوبته عمة اسيا بتشفي: على شنو مدوخ روحك بمسؤوليتها؟ مو كلتلك زوجها لأبني نائل وهو يتولى مسؤوليتها وهو هسة يدرس بالخارج وهي متعودة على حياة الخارج تسافر هناك وياه.
اهوووو هم رجعت فتحت هذا الموضوع التافه، هاي من كل عقلها اني اتزوج ابنها نائل؟ التفتت لعمو مؤيد منتظرة جوابه. مؤيد بنفاذ صبر: اسيا سدي الموضوع هذا الحجي مو وكته، انا كم مرة گلت هذا الموضوع منتهي والبنية صغيرة مو حمل زواج. اسيا: براحتك انا ما اجبرك توافق لان ابني الف من تتمناه، بس علمود انت عمها للبنية وخاله لابني كلت تزوجهم وهو يخفف عنك الحمل. مؤيد: هاي خليها علية حلها عندي انا اعرف شلون اخليها تسوي حساب لمستقبلها.
باوع علية بتوعد، كمت من مكاني واني اتسائل عمو شبي وياية؟ طول عمري عايشة بحرية ما يوم حاسبني. بس هسة ما اعرف ليش هيج متغير، قبل جان ميتأثر بكلام عمة اسيا. عبالك ديحاربوني، اختنكت واتوجهت لباب الصالة ودرت وجهي على عمة اسيا بغيض: هسة ارتاحيتي من خليتي عمو يعصب علية كله منج. عمو كام من مكانه وصاح: رررريم انتي شلون تحجين وية عمتج بهذا الاسلوب مو عيب؟ اسيا: شفت هاي نتيجة الدلال، انانية تفكر بس بنفسها.
ريم: اني مو انانية اني احبه لعمو و... مؤيد قطع كلامي: ريم كافي ما اريد اسمع منج اي كلمة هسة تجين تعتذرين لعمتج كدامي. سكتت ولميت اصابع ايدية، باوعت لوجه عمو الاصفر التعبان وقررت اعتذر لخاطره: اسفة عمة. اسيا بمسكنة: اني من احجي عليج ترة كله علمود مصلحتج. سكتت ما جاوبتها بس گلبت عيوني مختنكة من كذبها ونفاقها ادري بيها تتمسكن كدام عمو.
مؤيد: يالله سدوا الموضوع، صديقي ابو سيف على جية عندي شغل وياه. كام ولزم راسه: يالله انا فايت لغرفتي ابدل ملابسي. اسيا: اخلي ام فلاح تحضرلك الغدة؟ مؤيد: لا ما اشتهي بس اريد تجهزون شي للتقديم بين ما يجي صديقي ابوسيف. اسيا: ان شاء الله. باوعت لعمو دخل لغرفته واني صعدت فوك لغرفتي. اسيا: اني راح انطي خبر لام فلاح تجهز صينية وانتي تنزلين تقدميها لعمج لان اني هسة اطلع عندنا واجب تعزية.
ريم: ان شاء الله من يوصل عمو ابو سيف خليها تنطيني خبر. دخلت للغرفة وسديت الباب واني كولش ضايجة. رحت اتوجهت لنقالي واتصلت على صديقتي ندى: الو هلو ندوش.. اوووف لج ندى يمكن راح ارتكب جريمة. ندى: والله مبين من صوتج الاوضاع يمج متوترة، يعني عمج عرف بالنتيجة؟ ريم: اي والفضل لست اسيا، ظل يرزل بية وكلي اعتذري لعمتج. ندى: بس هيج؟ ريم: اي بس هيج بعد شنو تردين اكثر من هيج قهر؟
ندى: يابة حمدي ربج لعد لو تعرفين الجماعة العندي شنو سوو بية، انكلب البيت جحيم، امي عبالك مرت ابوي صارت كل شوية شاحنة ابوية علية، هسة اني فارضين علية حظر التجوال وسحبوا مني المصرف والطلعة واتوقع النقال ينسحب مني بأي لحظة. ريم: اهووو هاي شنو اهلج شكد قاسيين، افتهم من كلامج متروحين لحفلة مهر ريتاج؟ ندى: والله انتي بطرانه احنا بيا حال وانتي كاعدة تدورين حفلات.
ريم: اشكد مكروهة لازم تخربين واهسي، هسة يعني شنو واذا رسبنا؟ خلينا نخطط شلون راح نقنع اهلج حتى يوافقون تروحين وياي. ندى: ريم انتي شنو متسمعين؟ مو صارلي ساعة اكلج اهلي فارضين علية حضر تجوال. ريم: اي شبيج خلينا نحاول وياهم بلكي يوافقون. ندى: حبيبتي هذولي مو عمج مؤيد وما يرفضلج طلب، الجماعة العندي اذا اكوللهم على الحفلة احتمال يكتبون بية ورقة فصل من العشيرة.
ريم: اوف منج ندى سويتيها ظلمة، والله اضوج اروح لوحدي. ندى: اكلج انتي مو قبل شوية كلتي عمج كام يحجي عليج؟ شلون راح يوافق على روحتج للحفلة؟ ريم: اي عادي اخليه يهديء شوية واحجي وياه اكيد ماراح يرفض. ملتهية احجي بالنقال انفتح باب غرفتي ودخلت عمة اسيا حتى بدون متدك الباب. اسيا: شنو انتي طرشة؟ ريم: شكو شصاير؟ اسيا: صارلي ساعة اصيح عليج، وهاي انتي ويامن تحجين؟ ريم: احجي وية ندى اتفضلي عمة شنو ردتي؟
اسيا: سلامتج عيني ما اريد منج شي بس لازم تنزلين لان ابو سيف على جية واني راح اطلع. ريم: اوك انتي نزلي واني جاية وراج. اسيا: يالله مو تتأخرين وكافي مكالمات. دارت وجهها وسدت الباب. ريم: شكد كريهة.. الوو ها ندى راحت؟ ندى: خرب هاي عمتج شكد حقنة، اكلج هي شوكت تسافر؟ ريم: اولادها الي بالخارج ديمشون بالمعاملة، بس انتي ادعي تخلص بسرعة لان طلعت روحي. سمعت صوت الجرس: يالله ندوش وصل عمو ابو سيف لازم اروح.
نهيت الاتصال وگمت من السرير، عدلت شعري الكاريه القصير، لبست حفايتي الفرو ونزلت. لكيت ام فلاح مجهزة الصينية (فنجانين كهوة وبقلاوة) وعمة اسيا طلعت. ام فلاح: خالة ريم ديري بالج من تشيلين الصينية مو تروحين وجه الكهوة. ريم: لتخافين خالة. سمعت صوت عمو مؤيد يحجي وية ابو سيف بالاستقبال، اخذت منها الصينية ومشيت بهدوء. كان باب الاستقبال مردود شوية كنت اسمع اصواتهم.
رسمت ابتسامة على وجهي واجيت ادخل، اني اعرف عمو ابو سيف صديق عمو مؤيد وهو محامي، متعودة على تواجده بحياتنا لدرجة احس بي مثل عمو مؤيد. لزمت ايد الباب اريد افتحه لكن استوقفني كلام عمو مؤيد: مؤيد بالله ممكن تفهمني شنو سالفة هاي الاسماء الي تريدني اجمع معلومات عنها؟ مؤيد بصوت تعبان: مهيمن مؤيد... جلال مؤيد... نور مؤيد... هاي الاسماء الثلاثة اسماء اولادي. ابو سيف متعجب: اولادك!!!!
اهتزت الصينية بين ايدية وجمدت ايدي اللاخ على يدة الباب مصدومة من كلام عمو مؤيد. معقولة الي سمعته؟ شنو عمو مؤيد متزوج وعنده اولاد هاي شوكت وليش اني ما اعرف عنهم شي؟ انتبهت لوكفتي واتذكرت صينية الكهوة، طرقت الباب ودفعته ورسمت ابتسامة مصطنعة ودخلت. قطعوا كلامهم وباوعوا علية. سلمت على عمو ابو سيف وعيوني على عمو مؤيد.
ابوسيف: هلا بريمة شنو هاي الاخبار الي سمعتها عنج والله زعلتيني منج. مؤيد: لا تتعب نفسك وياها هاي البنية خربها الدلال وشكلي لازم اعيد حساباتي بشأنها. باوعت عليه بأرتباك، بعدني ما مستوعبة عمو مؤيد عنده اولاد! الأسئلة تدور بعقلي: وينهم؟ ليش ما اعرف؟ شكد أعمارهم؟ انتبهت لعمو ابو سيف: شنوعمو ريم وين صافنة الماخذ عقلج يتهنى بي. مؤيد: عوفها الظاهر بعدها زعلانة من عندي.
ريم: لا عمو اني ما اكدر ازعل عليك اكو وحدة تزعل من اعز انسان على گلبها؟ ابتسم وعيونه بيهم هموم، قدمتلهم الكهوة والبقلاوة واخذت الصينية الفارغة: اني استأذن منكم اخذوا راحتكم. طلعت وتركت الباب شوية مفتوح وراية، واتكأت عالحايط الي بصف الباب المفتوح. مؤيد: اتفضل اشرب كهوتك. ابو سيف: تعال گلي هذا الكلام الي سمعته جان صحيح؟ مؤيد: الي سمعته صحيح مهيمن وجلال ونور اسماء اولادي.
ابو سيف: والله يا مؤيد بعدني ما مستوعب، معقولة انت عندك ثلاث اولاد وزوجة؟ زين ليش تريد مني اجمع معلومات عنهم يعني انت متعرف باولادك وين همة؟ مؤيد: انت لو بس تسكت شوية وتنطيني مجال حتى افهمك. ابو سيف: اتفضل احجي خليني اسمع صاحبي شنو ضام عني من اسرار. مؤيد: هذا وانا بعدني محاجيلك شي من الماضي وانت مصدوم، زين لو احجيلك شلون صاروا عندي ثلاث اولاد شراح تسوي؟
كنت حاضنة الصينية لصدري اسمع كلامهم والفضول يقتلني. بدأ عمو مؤيد يحجي لأبو سيف: تعال خلي احجيلك كلشي حتى تساعدني بالبحث عنهم. ابو سيف: اتفضل احجيلي عن زوجتك واولادك. مؤيد بتردد: بالحقيقة هي مو زوجة وحدة وانما هن ثلاث زوجات. ابو سيف بتعجب: شنو!!!!!! شهكت وحطيت ايدي على حلكي، ثلاث زوجات؟ شكل عمو اليوم ناوي يجلطني بمفاجئاته.
مؤيد: أنا بدت قصتي قبل ٣٠ سنة، جنت دائما اطلع واسافر وية ابوي الحجي، وصادف سفرة من السفرات بالبصرة قدموا هدية لابوي والهدية كانت بنية واحنا گاعدين بمضيفهم وابوية انحرج منهم مكدر يرفض الهدية، والوالد راد ميجرح امي فكلي: مؤيد راح اعقدلك على البنية الي هدوها النا. اني بوكتها كان عمري عشرين سنة بعدني شاب بالكلية، حااولت اقنعه بس الوالد لزمني من ايدي التوجعني وخيرني بين امرين.
لو اوافق واتزوج البنيه لو هو يتزوجها ويكسر امي، اضطريت اخضع ووافقت، كان اسمها زهرة. اتزوجتها بس كان اتفاقي وية الوالد تبقى يم اهلها بالبصرة علمود دراستي ببغداد. كنت اروح وارجع عليها، وهي كانت حلوة وحلالي وفعلاً كنت ما اشبع من حضنها الدافي، كانت بنية قانعة وصبورة. بس هذا الشي كله مخلاني اشعر بأني متزوج صحيح، كانت بالنسبة الي محطة استراحة مسافر مو اكثر، اروحلها حتى البي رغباتي فقط.
بأثناء دوامي بالكلية، التقيت بطالبة جديدة اسمها رانيا متت عليها واخذت عقلي وحبيتها، بحيث نستني عندي زوجة. رانيا كانت تريد الزواج حالها حال اي بنية، اخذت اهلي وتقدمتلها بس ابوها من عرف بية متزوج رفض، وهنا حسيت بگلبي راح يوكف. صرت اناني، شفت نفسي مامجبور ابقى وية زهرة لان زواجنا كان مو باختياري، ما اتحملت اصبر، رحت للبصرة واختلقت المشاكل وطلقتها بدون ميرفلي جفن على سبب تافه.
اتذكر شكل زهرة شلون گامت تبجي وتتوسل حتى ما اتركها واني بكل جحود تركتها وطلعت. ورة فترة وصلني خبر ان زهرة حامل، ما اهتميت ومكلت لرانية خاف ابوها يرفض. المهم اتزوجت رانية، ووصلني خبر زهرة جابت ولد وسمته مهيمن، دزيتلها محامي الوالد وجريت راتب لها وللطفل، بس المبلغ كان يرجع مثل ماهو لان زهرة عزيزة نفس ورفضت فلوسي.
بعد ولادة مهيمن بكم شهر، اهل زهرة طلبوا مني اتمم الطلاق عند السيد لان طلاقنا وهي حامل كان باطل. سافرت للبصرة والتقيت بزهرة كانت شايلة طفل بالگماط، السيد سألها عن حقوقها كالت: انا راح اتنازل عن كلشي بس ما اريد اشوف وجهك لا من بعيد ولامن قريب، انا راح اعلن بين الناس انك استشهدت. اتفاجئت بطلبها، ومن يومها صرت بنظر الناس هناك ميت، وهي ثبتت لي ان هي قوية الشخصية ومن عندها انقطعت اخبارهم عني.
ابوسيف: يعني ابنك مهمين هسة عمره تقريباً ٢٩ سنة؟ مؤيد: اي نعم. ابو سيف: استمر كملي وشنو صار بعدها؟ مؤيد: بعدها كملت حياتي ومرت سنتين ورانيا حملت، بس حملها كان كلش صعب وصارت تنفر مني وتلعب نفسها من ريحتي، هملت البيت وصارت مشغولة بوضعها الصحي. كثرة ابتعاد رانيا عني دفعني للبحث عن علاقات طيارية، لكن بيوم صادف اجتي بشركتنا موظفة جديدة اسمها سهير، كانت صغيرة وجميلة جداً.
وگعت عيني عليها واخذت عقلي، حاولت اتقربلها بس هي رفضت إلا بالزواج. وافقت اتزوجها بالسر واستأجرتلها شقة وسكنت هي وامها، كنت اعيش وياها احلى ايام سلطان زماني، كدرت احافظ على السر لمدة ثلاث سنوات، ليش ما مرة سهير صارت حامل بالغلط، اتخبلت وحركت الدنيا وطلبت منها تسوي إجهاض وإلا اطلقها، وبالفعل سقطت الطفل بذاك الوقت.
بعد فترة رانيا انطوت على نفسها بسبب وفاة ابوها وهملتني، فزادت علاقتي بسهير لدرجة ابات عندها واكول لرانية مسافر. وهم اتكررت غلطة الحمل وسهير حبلت من جديد، هالمرة قسيت عليها وطلبت تسقط بس سهير فاجئتني برفضها واصرارها بالاحتفاظ بالجنين. خيرتها بيني وبين الحمل وصدمتني من فضلت الطفل علية. كالتلي: مؤيد اني اريد احس بالامومة، انت متشوف بية غير قطعة جسد تفرغ بي حاجتك، روح اطلع من حياتي اني راح ابقى محتفظة بحملي.
بيومها طلعت من الشقة وبعد ما التقيت بيها، ومرت فترة وانشغلت بشركتي وبديت ارمم علاقتي وية رانية وحاولت اسافر بيها للخارج حتى تغير من نفسيتها
والحمد لله بدت ترجع رانية مثل قبل وأكثر بس مع الأسف ما كدرت تنسيني سهير، لكن عنادي وراسي اليابس بقيت مصر ما التقي بيها، والباعني أبيعه؛ فضلت علية طفل بعده ما جاي للدنيا واختارته وتكولي أحبك.
ومر تقريباً ٨ أشهر، وبيوم عيد رأس السنة، كانت رانية مسوية حفلة بهاي المناسبة، وكان عمر جلال بوقتها ٣ سنوات وعازمة أقاربها وأقاربي بالبيت. وأنا كأي أب لازم أكون متواجد، وكوة ضغطت على روحي وتركت نص الشغل معلك حتى ارجع أحتفل بعيد رأس السنة وية عائلتي وأهلي.
وليش ما شاءت الصدف وبهذا اليوم بالتحديد، بأثناء ما كنا نحتفل، اجتي لبيتنا أم سهير تبجي وتتوسل حتى ألحكها، لان سهير عندها ولادة متعسرة وراح يسولها عملية فتح بطن ولازم الزوج يجي يوقع وتحتاج المساعدة. سمعت صوت شهكة وراي، وبهت لوني من التفتت وشفت رانية واقفة وراي، وشكلها سمعت كل كلام أم سهير.