_ قوامك فتان وطرفك احور ووجهك من ماء النقاوة يقصر تصورتك في عيني اجل تصور فنصفك ياقوت وثلثك جوهر وخمسك من مسك وسدسك عنبر وانت شبيه الدر بل انت ازهر فلا ولدت حواء قبلك واحدا ولا في جنان الخلد مثلك اخر فيا زينت الدنيا وغايه المنى فمن الذي عن حسن وجهك يصبر فائن شئت تعذيبي من سنن الهوى وان شئت تعفي فائنت مخير .. ♡ حكيم '
حكيم : طلعنه الصبح الحلاق اني ونزار خلصنه وديت دشداشتي ودشادشت نزار للكوي وصيت على ديجي للنسوان جابو وصيت عشه للحنه ونزار جاب الكيك وكبسات الببسي ترسنه براميل مي وثلج وحجيناهن بيه حته يبردن خلصت شغلي سبحت وبدلت لان عازمين بيوت عمامي بالبستان فلاح قرر ميسوي حنه بس كعده وراح نسويه ابيتنه باعتبار ابوي الشيخ وهمه مو غربه طبيت للهول انشف بشعري شفت فاروق مدلغم ويكلب بالتلفزيون ..
_ شبيك متكوم تبدل ماضل وكت _ لا اطلع ولا اوصل وييين صايره هاي ياخذون بتنه ونسويلهم كعده وعشه ويجي فلاح النكس يدوس بيتنه بعد ما طعني بضهري
_ فاروق شكم مرا حجينه بهاذه الموضوع لك بابه صارت على ذمته متغير شي بعد بهاي تصرفاتك بس تكره روحك بين الوادم _ اليكرهني هوا وهاذه اشر على الابسه برجله
_ مو هيج راح تبين كدامهم انته مراضي واختك كسرت خشمك واخذته غصب عنك .. بس كتله هيج انتفض وكام يسب _ شنو غصبا عن خشمي لو اريد ميت نعال اركعه هيا ويا
_ والعالم شمدريهم ؟! بعد بكيفك تريد الوادم تاكل وجهك انته تدري الناس بيت بلاء ميسكتون واليوم الولد كله جايه .. المهم لتجي بس شكللهم اذا سئلو عليك ؟ _ احم .. عدل كعدته ، لتكللهم راح اكوم ازين وابدل خنشوف شنو تاليته ويا نجاة البربوك
_ كام طب للحمام يدردم زين لحيته وطلع .. تلبس دشداشه ؟ .. حته اخلي نزار يكويه _ اي .. راح البس الرصاصية
_ خوش .. طب نزار ليهث لزم كلبه ، شبيك بويه ليش تلهث رحت للمطبخ جبتله مي واجيت انطيتهيا نزار : جد جدي احترك شوكت يخطبوني واخلص منكم
حكيم : ههههههههههههه لعد اليوم رتب روحك بلكت تجيك قسمه زينه
نزار : عمي زينه موزينه راضي المهم يستر عليه " نعم صوته .. كلشي مارايدين غير الستر والمي والكهرباء ..
_ انجب لك شو اخذت راحتك انته بالحجي _ نزول عليك كيمو .. حط راسه على جتفي يقلد نبأ ... كفخته
_ شو صاير هتلي
_ تربيتك
_ هاي اني مربيك وهيج لو فاروق جان اشطلعت
_ جان كتبنه على البيت لافته .. ديسكو النزارق وجواهة ملاحضة : يوجد لدينا جميع انواع الفواحش .. بادارة الحاجة اصيله اطال الله في عمرها
_ ههههههههههههههههههههههه دمعت عيوني من الضحك
_ شوف وين تلكه واحد يضحكك مثلي
_ فدوه الطولك حبيبي .. يلا روح اكوي دشداشه فاروق ماضل وكت
_ ليش اني ميكويه هوااا _ جاي على هاذه العجوزي هسه يلبسه بلا كوي
_ لعد خل انزله للبنات جوه _ دكويه انته ترا مو تعبه البنات جوه تلكاهن مخبوصات
_ امري لله هاي الخاطرك بس _ غمزتله ان شاءلله يوم عرسك واكويلك دشداشتك بيدي
_ يماااا ليش هيج تخليني اشطح مو حيلي باد .. خاف بيه تابعه ومحد يخطبني قلد صوت نرمان عمووووو
_ ههههههههههه اذا اضل يمك للصبح انضل نجادل .. خابرت فلاح اتفقنه ساعه 5 لازم كلشي جاهز اتئكدت من كلشي كامل شفت فاروق ونزار مبدلين طبيت بدلت وطلعنه لفيت شماغ رصاصي واحمر على راسي
نزار : اني هم سويليا مثلك
_ تعال .. اخذته منه ولفيته على راسه باوع بالمرايه وضل يوزع ابتسامات باوعت على فاروق تريد اسويلكيا؟
_ لا ماريد شعري يتخربط خلي هيج احلى
حكيم : يلا امشو خابرت كمال كال جبت نجاة من الصالون خل انشوفه وانباركله قبل لتجي النسوان واصير هوسه _ نزلنه جوه طبينه من باب الكليدور حته خاف اكو نسوان بالصاله زحمه بس فتنه اجت عيني على وحته لابسه فستان احمر طاغي على بياضه الناصع مدنكه وبارزه مفاتن جسمه الجذابه شعره نازل على وجه منزله ايده تعدل بحذائهه نزلت نضري عنه لحد ما رفعت جسمه وبين طوله وضهرت ملامحه ركزت بيه وانصدمت نرررررمان ؟
_ نززززلو روسسسسكم
فاروق : نزلت نضري عنه متفاجئ هاي نرمان ؟
حكيم : اخذتهم وطلعت برا كلبي يرجف من شفته واني مادري شصار بيه انفاسي مجاي تنتضم عيوني ثكلت بس اعصابي جاي اجمر كل لحضه اذكر بيه نزار وفاروق شافوه
فاروق : لك هاااي نرمان وين ضااامه هاذه كله واني الحسبالي طفله تاليته طلعت اني الطفل
نزار : اي والله ممبينه لان لابسه جبه
حكيم : قاطعتهم بعصبيه اكسررررو عيونكم النكسه لا اكسر عظامكم
فاروق : لا يابه عليمن تكسر وتطحن بس والله قطعه خرب عرضه
حكيم : لزمت اعصابي بما فيه الكفايه جريت فاروق من ركبته وحجيت من بين سنوني .. قسما بالله يافاروق اذا ضليت تفكر بيهه ساعته مراح احسب اي حساب الخوتنه
فاروق : تريد تضرب اخوك علمود وحده ؟
حكيم : ما ادري شلون فقدت اعصابي من سمعته يحجي بيهه هديته ورجعت خطوه ليورا صارت تراودني افكار غلط كمت اخاف واحد يفكر بيه وتخيل بجسمه قاطع افكاري كلمه من فاروق هزتني هز
_ حكيم تحبهه
_ هزيت راسي لا فارروق ماحبه جاهله شلون احبه
نزار : فاروق شيحب منه شبيكم صلو على محمد هنه شحمايات شفناهن ونسيناهن .. انتبهت على حكيم خزرني حسيت سنونه راح اطك دنكت راسي خاف يهفني براشدي واذني اطوط
حكيم : نزار احجي عدل فاروق : يعني انته تريد تقنعني الرعشه البيك مو منهه
حكيم : كافي لدوس بالحجي البنيه مثل بنتي اختي شتعتبره اعتبره بس لتفكر بغير شي عبرته اتمشى
فاروق : زين اني اريدك تخطبلياهه
حكيم : استوقفني كلامه .. شنوو عيد ؟
فاروق : اي اخطبلياها شكو بيه .. عبالي ذيج الفتره نفسك بيها .. والي اليوم من شفتها مرا كاملة مابيه عيب ويامه ويامه بنات ازوجن بعمرها واصغر
حكيم : انته شجاي تخربط شنو نفسي بيهه وهاي الفكره شيله من بالك وحطه باقرب مزبله
_ ليش عود اني حالي حال الشباب اريد ازوج واستقر احسن متروح للغربه
حكيم : تجاهلته لان كلامه ميصير اله على جثتي طلعت برا ادخن كلما اذكر شكله وجسمه يقشعر جسمي اريد امسح صورته من بالي طبت الكشره على راسي
نزار : لك فاروق صدك تحجي تريد تخطبهه
فاروق : سحبت نفس من الجكاره .. شفته شلون تكهرب من كتله اريده
_ وانته صدك حاط عينك عليه ترا ليغرك شكله بعده جاهله
_ هاي شبيك اغات اغاته عندي اخطب نرمان ؟ بس ردت اشوف رده لان متئكد عنده غايه اتجاه وين اكو واحد بهاذه الزمن يربيله بنيه ويحير شيجبله وشيحطله اذا انته عبرت عليك اني متعبر عليه ..
نرمان : بس شفتهم لزمت صدري لان مفتوح طلعو مباشرا طبيت للغرفه احس وجهي جمر ضليت اهفي ميته من الخجل اني النسوان استحي يشوفني انووب عمو واخوانه شلون احط عيني بعينهم بعد كمت اطكطك باصابيعي وافتر بالغرفه سمعت صوت الباب يندك فتحته شفت روان
_ يلا طلعي اجوي العالم _ طلعت من الغرفه فتحت للصاله شفت نجاة طالعه مثل الكمر ببدلته السمائيه وتسريحت شعره على طوله حاطه مكياج صارخ بس كلش لايق الملامحه بدت العالم تجي وتقريبا الكل ماعرفهم عدا اهل البيت وام فلاح شايفته قبل طبت ام فلاح وياه وحده لابسه عبايه وبيده بنيه تشبه بس شافته نجاة تغيرت ملامحه واختفت ابتسامته من خلال النضرات عرفت هاي زوجته الثانيه والقاجئني انه حلوه وجسمه مرتب يطلع عمره بالثلاثين بس دخلت نزعت العبايه وبين فستانه الاسود كعدت كبال نجاة تبتسم شويه وابن كمال شغل اغاني ساجده عبيد وكامن النسوان يركصن
روان : باعي هاي مرت فلاح الثانيه صخونه جنه بغل
نرمان : سكتي لسمعج خطيه _ شويه وكامت شدت وصله على خصره وكامت تركص بشكل هستيري اكثريه الحضور جانو يشاورون من يشوفوها حسيت لو يحجون عليه كدامه افضل لان هل شي يحركهه اكثر انتبهت على نجاة دمعت وكامت تفرك بيده تقربت يمها همست
_ نجاة لزمي نفسج لا كدام العالم ترا من حركت كلبه جاي اسوي هيج .. هزت راسه وضلت صامده رجعت المكاني كامت روان سحبتني من ايدي حته اكوم اركص ماقبلت لان اخجل رجعت كعدت اجت عمتي اصيله سحبتني من ايدي وهمست يم اذني
_ كومي ركصي يما خل نشوف طولج
_ اتفاجئت بيها معقوله الله هداهة عليه كمت فرحانه بتصرفه وكلمت يما دكت بكلبي كمت اركص على اغنيه
_ العب بيها يابو سميره .. العب بيها يابو سميره الضحكه هاي تلوك الك لو بيدي اخطفك من هلك
_ تحمست وكمت اهز واركص كامن بنات ماعرفهن يهزن وياي تكابلنه نركص لحد ما اسفل بطني كام يوجعني كعدت الهث شفت عمه اصيله تشاور وحده وتئشر عليه ابتسمتله ودرت وجهي بعدين صاحو العريس راح يطب يحني العروس طلعت جبت جبه وحجاب لبستهن وطبيت اجه فلاح هوا ولد يطلع عمره 9 سنوات لابس دشداشه وغتره باس نجاة من راسه اجت عيني على مرته الثانيه كامت دموعه تنزل وخانسه
نجاة : من باستي وسمعت صوت بجي مرته بأنين تركني وراح باس راسه انقهرت كلش من الجاي يصير ليش جابه بيومه ماحسيت بفرحه ابد حنه ايدي وضل يشاقه واني مدلغه
فلاح : ولج ام خشم باجر تنامين بين ضلوعي
نجاة : باوعتله بطرف عيني .. تقرب باس ركبتي جمدت بمكاني عرفته يريد يكسره كدام العالم
نرمان : ضلو يطكطون صور كمت طلعت اشرب مي جاي افوت للمطبخ سمعت واحد يسوي بسبس رجعت ليورا خطوتين التفتت شفت الولد الشفته بالمهر اشرت على نفسي تحجي وياي ؟
_ اكو احد غيرج لعد _ نعم ؟ _ ماكتيلي انتي ياصف ؟
_ استغفرلله
_ قلبك عامر بالايمان
_ تقدم ارتجه على الكاونتر
_ هسه مراح تكليلي شسمج
_ تجاهلته ورحت اشرب مي كملت وذبيت الكلاص جاي اطلع كال _ حلو الاحمر عليج اختيار موفق
_ رجعت عيني عليه باوعت على نفسي ممبين مني شي شلون عرف اني لابسه احمر حجيت بنتره .. وووين شفتني لابسه احمررر _ اعصابج يابه ذيل الفستان نازل
_ درت وجهي شفته صدك طالع ابتسم ابتسامه ماعرفت افسرها وكام طلع شوووكت تخلص الحنه شكد اكره هاي المناسبات التفتت شفت مبايله على الكاونتر شلته وطلعت اهرول للحديقه مديت راسي جانت هوسه وماعرفت اميزه ضبيت جبتي عدل حته ميبين مني شي طلعت بالباب اتلفت شفته واكف ويا شباب حجيت بهدوء
_ ياولد مالتفت .. يمعود .. اففف هادي بس كلت اسمه التفتو عليه
_ وياي ؟
_ اي هاذه مبايلك تفضل سحبه مني مبتسم كبل طبيت جوه قبل لا واحد يشوفني واصير سالفه رجعت اساعد البنات بتوزيع العشا جايبين حافظات سفري بيها مشاوي وصمون ومقبلات
اسراء : اي والله رحم الله والديه الحكيم نقذنه من المواعين والهوسه
روان : كمال ونجم مارضو يردون ام العراوي ينصبون وطبخ بس ماقبل الله ينطي
_ كمت ادعيله وياهن على الواهس لان صدك يستاهل الدعاء خلصنه توزيع اخذو الالكل الاغلبيه باركو وطلعو واكو بقو ياكلون لليل ماضل احد غيرنه ورحاب وبسمه هم ضلن باتن بس بدلت ملابسي وطلعت اساعدهن ضلينه نشتغل لساعه 3 بليل وراه كلمن راح الغرفته طبيت الغرفه نجاة اشوفه هم دتكمز من الفرحه بس الفاجئني نجاة تبجي وتشهك رحت اركض عليه حضنته
_ ليش تبجين ولج نجاة : نرمااان ماريده ماريده شفتي شلون باس مرته شفتي شلون شبكهم وطكو صور ليش ماكلي يحبهم ليش اخذني لعد اذا يحبه
_ احجي بس مزعلين _ مسحت انفه ايي _ انتي متدرين بي مزوج وعنده جهال اخذيني على كد عقلي وسمعيني اني شكد صارلي يمكم
_ شمدريني اكعد احسب
_ صار سنه صرتو اهلي واعز واني غريبه مجرد عمو حكيم ينصحني كمت احبه وذا اشوفه يزوج ويبوس مرته يمكن اموت بسكته قلبيه انوب مرته وام جهاله تريديه متبجي
_ لج هاي منو مدرسج حكيم _ لا والله بس الانسان من يتعلق بشخص يصعب عليه يشوفه مع شخص ثاني
_ اي اني ما اتحمل خلي يطلكني
_ مادري شوفي عمو واحجي ويا _ مسحت دموعه وفتحت جهازه دكت على فلاح وكامت تبجي وتكوله طلكني كمت اشرله ميصير هيج تحجين بس متسمع مني ضلت تتعارك وتصيح نص ساعه وفجئه بدون مقدمات كامت تضحك وتكول ييي مممم صدك هزيت ايدي وطلعت طبيت الغرفتي ميته تعب نزعت الجبه والحجاب شمرتهن فتحت مبايلي شفت مكالمات لم يرد عليها ورسائل بس دخلت على الواتساب شفت رساله كامت تنطح رساله قريت اخر وحده مكتوب بيه
_ وينج ساعه 3 شدسوووين _ دزيتله .. شبيك عمو خير مباشرا رد
_ تعالي يمي اريد احاجيج
_ تعبانه خليه باجر _ تجين لو انزل اني _ لا راح اجي دز
_ لبسي جفن وتعالي اصبعج مالمحه نرمان
_ كتبت ماشي .. انقهرت من كلامه لبست جبه وحجاب وجواريب مالي خلك الرزايل طلعت من باب الهول لان فارغ صعدت بالدرج كبل انفتح الباب قبل لا ادكه طببني وسده بيده جكاره سحب منه نفس عميق ونفخه بوجهي غمضت عيني من الدخان وكحيت عافني وكعد على التخم يدخن باوعت عليه بعده بدشداشه بس فاتح الدكم مالته باوعلي بطرف عينه وكال
_ شلون اطلعين هيج بالممر
_ شمدريني انتو راح اطبون _ الفستان منو جابلجيا _ اني اشتريته _ منين _ طلعت ويا نجاة اشترينا من السوك _ صفن بوجهي صفنه طويله عبالي جمد شوي وحجه بحت صوته
_ ليش تلبسين هيج فساتين مو مال عمرج
_ خجلت من كلامه دنكت وضليت ساكته حسيت نفسي صدك غلطانه الفستان كلش مفتوح وغلط البسه
_ ليش سكتي _ اخاف اكول اسفه وانوب تكب عليه _ ماسويتي شي غلط حته تتئسفين تعلمي خلي كلامج عزيز مو كله تستاهل تعتذريله حته اذا جنتي غلطانه ساعات يكون المقابل يستحق تغلطين بحقه
_ يعني بعد لو شيصير ما اتئسف منك ؟
_ هوا هاذه التعلمتي من الحجي
_ ءء عمو نعسانه مجاي اكدر اجمع خلي انزل جوه انام باوع الساعه بيش _ ضايج ضلي هنا الولد راحو يسهرون ويا فراس
_ اي ليش مرحت وياهم _ ماحب كعداتهم مو مزاجي
_ بربك لعد شنو مزاجك اني ؟!
_ باوعلي بحديه واخذ اخر نفس من الجكاره وشمره بالكاع وداس عليه برجله وحجه ..
" والله لانعل ابو شكلج "
_ سكيوزمي !
_ ماسمعت غير طكهه بضحكه رج البيت بيهه
_ عمو اني نازله عفته اريد انزل وسمعت صوت حجي كل شويه يقترب التفتت على حكيم كام وكف واشرلي بيه اششش اندكت الباب وصار صوت نقاشاتهم عالي اشرلي ادخل للغرفه واقفل الباب على نفسي سويت مثل ماكلي وسديت الباب لازمه كلبي
_ ياربي شيخلص هاي اليله على خير صار صوت كلامهم عالي واكثر من شخص وكفت اسمع _ هاذه العار ميرضه يبات اله بالبيت جبنا واجينه نكمل السهره يمكم لان منكدر نستغنه عنه هوا ملح الكعده
نزار : مديتله ايدي بوووس
_ ولا تستقر السلطانه هويام
حكيم : اخذو راحتكم اني اريد انام
_ يمعود وين بعدنه كاعدين _ باجر عندي هواي شغل وباوع الساعه بيش
الكل : مرخوص اخذ راحتك
_ طلعت من يمهم فتحت باب الغرفه على كيفي حته تعرف اني راح اطب اول ما دخلت شفته على وكفته سديت الباب .. _ عمووو اريد انزل شلووون _ ابقي هنا ذوله ميطلعون هسه
_ ابقى هنا ؟ لا فدوه اريد انزل اذا الصبح اجو ومالكوني بفراشي اصير طلابه مالي خلكهه _ ضلي هنا ومعليج _ ما اضل خلي اطلع ويشوفني قابل شكو مو لابسه جبه وحجاب زمخ بيه _ الصمييي نررررمان لتصيرين هيلك بهليل
_ سكتت ورحت كعدت على شازلونه اطكطك باصابيعي نتر
_ جججج ازعااااااج
_ راح تمدد وطفه الضوه .. ضليت احوس بالغرفه اخر شي فتحت مبايلي طلعت قصه مال فصليه لكيته منشوره بالفيس قاريه منها شويه كعدت اكملهه صار موقف كمت اضحك بي شويه وشفته رفع راسه صفن بوجهي شويه ..
_ ويامن تحجين ؟
_ ماحجي ويا احد جاي اقره قصه _ ماليش _ رحت يما كعدت على طرف السرير مال فصليه
_ شو وينه .. كام شغل التيبلام واخذه مني ضل صافن ساعه يكلب بالقصه
_ هااا عمووو شجاي تقره مو خوفتني
_ انتي مقتنعه بهاذه الخرط ؟
_ الصراحه " اي لان شوف الاحداث اكلت وشربت وبدلت والمصيبه الصارتلهم خطيه وراحت فصليه بس الله عوضه
_ اذا احجي تقتنعين .. _ اي _ اني ابن شيخ وعشاير وطاب وكاعد بمضايف مصاير لو ربع الصاير بهاي القصه ادري منو كاتبه سونك
_ ليش _ وين اكو واحد ينطي 100 مليون وبنته فصليه بالعرف العشائري كله ماصايره بالقوانين مال عشاير اهل المصاب يكسرون ضهورهم بمبلغ قوي والي ماعنده ينطي بنته فصليه لو دم بدم الفصليه تروح حته يذلوه ويكسرون ضهر ابوها بيها وهل شي معروف عند الكل واضل بدون عقد محكمه العمر كله وذا رادو يدفعون مبلغ ذاك من ذاك الينطي 50 مليون لان بيوم الفصل تحضر هواي عشاير طبابه خير وكل شيخ يوكع من المبلغ شي حته يسهلوها وبعدين وين اكو واحد يودي بنته لبيت الفاصليهم ويكله دير بالك عليه هاي الغاليه وذاك يجاوبه احطه بعيني لعد ليش ماخذيه حته اسد مكان ابنهم ؟ وبعدين ثلاث ارباع الشيوخ الياخذون فصليات يعقدون عليهن زلم بكد ابوي ماكو شاب يرضه ياخذ فصليه اغلبهم يستنكف لان اضل ذليله العمر كله وتنذكر من جيل الجيل لاااا وفوكاه يكلله سنه واطلكج وترجعين لاهلج ..
_ عزا عمووو واني من قريته ليهسه مندمجه وافكر هسه شلون عايشه ونياله راحت فصليه
_ شوفي بابا اني مو من حقي امنعج من شي اذا حابه تقرين هاي الامور خليله حد بعقلج مجرد قصه اتسله بيه ومن اخلص ارجع امارس حياتي اتمنى متخليه من ضمن اساسياتج خلي كلشي اله حد او وقت وبالأخير هاي حاله حال اي مسلسل نشوفه ومن تخلص نشوف غيره
_ والله اني اقره هواي مجرد اضيع وكت لان عطله
_ السنه الجايه ثالث تريدين اجيبلج كتب تهيئين نفسج للوزاري حته الماده اسيطرين عليه ترا اني ما اخلي مدرسين وبذات انتي بنيه
_ بكيفك _ يلا طفي جهازج وكومي توضي خل نصلي
_ شلون اروح للحمام
_ عفته وكمت توضيت شفتهم مجطلين بالصاله كلمن بمكان اشرتله تجي تتوضه طلعت انتضره برا شويه واجت فرشنا سجادات ثنبن وكفنه نصلي صلاه الفجر سلمنه وكعدنه
_ تقرين وياي دعاء _ ابتسمت اي _ هاذه الدعاء تقري 7 مرات ورا اي صلاه واطلبين شنو تريدين بتوسلك بنبي الرحمه محمد راح ادزلجيا بالوتساب حته تقري دائما واضبي عليه بكل شده اذكري
_ هزيت راسي فرحانه بده يقره واني اردد ورا _ بسم الله الرحمن الرحيم ..اللهم اني اتوجه اليك بنبيك نبي الرحمه واهل بيته الذين اخترتهم على علما على العالمين اللهم لين لي صعوبتها وحزونتها وكفني شرها فأنك الكافي المعافي والغالب القهار ... عبد الحميد المهاجري مجرب "
_ خلصت واني رافعه ايدي مسحت وجهي وكمت لميت السجاده _ تعاالي نامو خل انزلج
_ طلعت اتمشى ورا بخفه فتح الباب ونزلني ضل واكف ما طب لحد ما شافني دخلت ركضت الغرفتي طبيت بفراشي وحسيت براحه مو طبيعية ثاني يوم كعدت الصبح لكيت نجاة رايحه للصالون والبيت هوسه طبيت للهول شفت نزار حاط جبس ياكل ويباوع على مسلسل تركي كعدت وهوا فاصل عن العالم ويا المسلسل لحد ما طلعت لقطه سخيفه ضل مركز وماكلبه كمت جاي اطلع سمعته يدردم ....
يتبع ....