حكيم : بصدمة .. وين رحتن
فاروق : لكيتهن يم ابو الاسواق بين الم*** يفترن
نرمان : باوعلي بنضرة تمنيت اموت وماشوفها بعينة كعد على التخم شبك ايدة وحنة ضهرة للامام مدنك ..
حكيم : شلون اطلعن بدون علمي !
نرمان : شهكت بالزايد .. والله اني ما اريد اطلع اصلا ما ارتاح من اروح للاسواق
حكيم : فتحت عيني على وسعها .. ليش شكم مرة رايحات
نرمان : تلعثمت انداريت اباوع النجاة تبجي وتخزر بية .. هاي اول مرا .. بس كلتها اتقرب علية لزمني من زندي بقوة وهمس من بين سنونة
حكيم : اجذبن مو وتستغفلني ..
نرمان : هز راسة بغضب هدني وراح على نجاة جرها من اذانها ..
حكيم : عود كبرتي وكمتي تمشينة بكيفج نجاة اصحي على نفسج ليش اجبريني امد ايدي عليج وصلت بيج اطلعين بدون مندري ..
نجاة : اذا انتو مطلعونة وين نولي مو راح اموت من الحبسة
حكيم : انتي شنو اشوفين اكدر اطلعج ولج مو جاي اطلعكم من حلك الموت انتي لو ذاك العار ولا بعينكم ولا بحاجبكم انعل الساعة الشفتكم بيها جلاب
نجاة : بجيت بحركة .. وخر ايدك مني حتة انتة تضربني
حكيم : تستاهلين ركع النعال انتي وذيج الثولة
نرمان : من شفت ملامحة كمت ارجف من الخوف .. عفية هدها الخاطري ..
حكيم : امشي نزلي لج وجهج ما اريد اشوفة بعد
نرمان : اني شعلية شعلية كلشي براسي هية اخذتني والله
حكيم : وانتي شنو مطية وجارتج وراها ماعندج السان لو دياحة وركع بوب وطز بحكيم منو قابل فد مندلة
نرمان : ضليت واكفة مصنمة بلعت غصتي ولزمت ايدي باضافيري كمت اجلغ بيها اريد اسيطر على غضبي
فاروق : شكلت .. يلة لج قندرة اطبين الغرفتج وقسما بالله اذا لكفتج طالعة بالنعال اركعج . نجاة : دفعني وطردني من الباب نزلت جوة اشهك
فاروق : راح الغي الباب الورا البيت اريد اشوف منين يطلعن بعد من زرف الحايط
نرمان : دنكت راسي ونزلت جوة ورا نجاة طبينة للبيت صارن بوجي مرت نجم وكمال عبرتهن ورحت ورا نجاة الغرفتة فتحتة وطبيت شياطين الدنيا كلها اجمعت براسي
_ لججججج انتيييي شكدددد جلبة كلة منوررراج انهانيت وصغرت بعينة كلة منوراج الف مرة كلتلج ما اولي وياج عوفيني بحالي ولي وحدج يطبج مرض معليج بية
نجاة : انجبي ولا صيحين ترة واصلة وياي لهنا اطلع قهر الله كلة بيج يلة ولي طلعي برا
نرمان : اطلع برا مو .. رحت لزمتها من شعرها وضربتها .. تلازمنة وكامت تضرب بية صار صوت صياحنة يرج البيت .. ادفعت الباب وطب حكيم .. ملخني من شعري وخرني عن نجاة
حكيم : صايرة صلفة هااااا
نرمان : هية جلبة هية ورطتني ..
حكيم : باوعت على الكل صارو بالغرفة وعيونهم بيها الف سؤال .. جريت شالها صعدتة وضميت شهرها
نجم : شبيهن ذني يزاكطن
حكيم : انعدن منك
نجم : صوتهن واصل للشارع ميستحن
حكيم : وهسة شتريد !
اسراء : شدعوة شكال قابل .. دغيت روان كبر مو ديحجي على رجلج
روان : عندة السان ويجاوب اني شنو
حكيم : باقر عمو ..
باقر : ها عمو
حكيم : شوفلي ابوك وين خل يجي يربط حصونتة
باقر : هسة اصيحلة
نرمان : اسراء كامت تخوزر بينة تريد تاكلنة لحضات وحكيم عاط بيهم
حكيم : يلة برا برا
نرمان : جرني من زندي وطلعنة سد الباب على نجاة وزمخ بية
حكيم : روحي ولي الغرفتج حساب بعدين ..
نرمان : عافني وراح طبيت الغرفتي افور من القهر رحت الميز المراية شلت العطور كلها شمرتها بالكاع حتة الفرشة ملختها وشمرتها حرت شسوي كعدت بالكاع حضنت نفسي ابجي .. قررت بعد صدك ما احاجيهم
_ ما ادري شكد مر وقت على كعدتي .. كمت اباوع للغرفة مكلوبة كلاب جريت غطة وتمددت وضليت ابجي لحد ما غفيت ..
ثاني يوم "
_ فزيت الضهر احس جسمي مكسر وبلعومي مشخط .. جريت نفسي من الفراش اذكرت البارحة مالي نفس اكوم انتبهت الغرفة صايرة زبالة طبيت للحمام غسلت ولبست حجاب ويا تراكي طلعت برا شفت الكل بالهول كاعدين ماسلتمت عليهم .. رحت لورا البيت جبت طشت ترستة مي وقطعة قماش قديمة وديتهن للغرفة ورشيت معطر وبديت انضف من كل كلبي قربت اخلص حسيت احد وراية التفتت ..
نجاة : شنو اليوم نازل عليج وحي النضافة
نرمان : انطيتها الاذن الطرشة ومادرتلها بال ضليت انضف
نجاة : خاب لا اجاوبين يطبج طوب
نرمان : شمرت الوصلة من ايدي ونترت .. هسة اني يمك شدخلك انتة
نجاة : ولج مكروصة وسم انتي محد دواج غير عمتج الحية
نرمان : دفعت الباب ورتبت الفرشة وكملت كلشي سديت الباب علية وبعد ماطلعت ولا احد اجة علية .. صار المغرب واذن لفيت نفسي بالحاف ونمت مقهورة محد صاحلي .. تقريبا مرت ساعة واندكت الباب .. كمت فتحتها وصرت وراها
نزار : ها ابو علي طلع راسك المربع خل اشوفة البيت بدونة فاهي
نرمان : ضليت ورا الباب .. تريد شي
نزار : اي هاج ذني جبت الي والج لان اني هم ما فطرت مسوين باجة
نرمان : اخذتة منة شفت فتحتهن لفات مال كص .. لا ما اريد بالعافية اصلا ما مو جوعانة
نزار : شسوي بيهن هواي جايب خليهن يمج اذا ما اكلتيهن عود اخذهن منج بالسحور
نرمان : اخذتتهن واشكرت منة وسديت الباب .. طلعتهن وكعدت اكل ميتة من الجوع .. حسيت ذني مو من نزار من عمو خلصت وفتحت مبايلي دخلت على الواتساب اشوف حسابة انصدمت من شفتة حاضرني .. يعني هيج كام يكرهني .. سديتة وشمرتة كمت توضيت وصليت حسيت نفسي تعبانة وبلاعيمي مورمة .. طلعت برا ما لكيت احد بس البنات بالمطبخ رحت للحديقة شفت نزار يسقي الزرع صحت علية .. نزارر
نزار : ها شبيج
نرمان : برطمت .. بلاعيمي توجعني كلش
نزار : جا منو كلج اني فولتارين
نرمان : لا مو قصدي .. اءء عمو وين
نزار : هنا الحجي .. طالع
نرمان : شوكت يجي
نزار : ما ادري
نرمان : يلة ماشي .. رجعت الغرفتي اكح وصداع موتني وصلت للغرفة
اصيلة : شبيها الدايحة .. جا حكيم من اخذج ما درة انتي بت عواطف وما ادراك ما عواطف
نرمان : لا يدري عمتي اصيلة وما ادراك ما اصيلة
اصيلة : جا لوما اني يكلبج قحط انتي اخخخ لو يرجع الزمن جان خليتج تاكلين من الزبالة وروح ابوية
نرمان : متت من القهر كزيت سنوني وضليت ساكتة بس بداخلي افور سمعت صوت التفتت
نزار : لو يرجع الزمن جان هواي عالم خليناها تاكل من الزبالة
نرمان : كامت عمتي تخوزر بي من فوك ليجوة عفتهم وطبيت للغرفة راسي صاير طبل .. ضليت كاعدة وحدي النص الليل كامت الكهرباء تطفة وتشتغل كمت فتحت الباب شفت بس غرفتي هيج .. هاي ليش شغلت فلاش المبايل شوية وطفت المبردة وكام يطلع منها صوت غريب كمت ارجف طلعت من الغرفة لازمة كلبي وما اكدر اتنفس طبيت للهول ..
نزار : ها يولو شعندج سهرانة
نرمان : صار انباري
نزار : يولو انتي وام الكركاش متعاركات ؟
نرمان : عرفتة ميدري بشي عن سالفة البارحة .. لا ممتعاركات
نزار : غمزتلها .. علييية ولج عاجنج وخابزج
نرمان : حجية فتنة
نزار : ابو علي
نرمان : اكلك .. شو المبردة طفت وجدها مااشوفليها حارة انام بدونها حتة الضوة ما ادري شبي يطفة ويشتغل وحدة
نزار : تعالي خل اشوفها .. رحت كدامها طبيت للغرفة شغلت المبردة .. اشتغلت مابيها شي
نرمان : قبل شزية طفت وحدها حتة الضوة
نزار : يجوز الكهرباء ضعيفة
نرمان : اي صح .. طلع من الغرفة طبيت ورحت سديت الباب كبل طفت حتة الضوة رجعت فتحت الباب اشتغلن .. اخذت مبايلي وطفرت من الغرفة اركض والهث .. ولك نزار اكو جن بالغرفة
نزار : جا انتة مو ابو علي شلون تخاف من الجن شو ذولة ماخذين عليك خاوة ميحترموك
نرمان : عوف الشقة والله طفة وحدها والقران امشي شوف بعينك .. اخذتة ورحنة للغرفة
نزار : ها شبيها الكهرباء مو كدامج كلشي مابيها
نرمان : وروح ابوية ما اجذب عليك باوع خل انسد الباب واشوفك شلون تطفة
نزار : لا يابة كعدي ميصير اسدين الباب وحدنة تجيج حجاية .. طلعت من الغرفة
نرمان : زين طب وحدك وسد الباب وشوف
نزار : خوش .. طبيت وسديت الباب .. صحت ترة ما طفت .. فتحت الباب ها ارتاحيتي
نرمان : اووووف يلة روح امري لله .. طبيت مرا لخ وهم صار نفس الشي .. رجعت طلعت مبرطمة بس ما اريد اضعف وابجي كدامهم .. معقولة اكو جن بالغرفة وين راح انام بعد .. كعدت بالهول مجتفة ايدي ..
نجاة : ها شسوين هنا كاعدة جنج شمعة فكر
نرمان : انجبي خووش ومعليج بية لا اكوم اسحلج مثل البارحة
نجاة : رحت كعدت يمها .. نونو
نرمان : وسم
نجاة : اسفة والله الصار بسببي وشفتي اني انكتلت وانتي محد مد ايدة عليج
نرمان : روحي نجاة كل سالفة اسويها اكبر من الثانية ماعندج اي احساس بالمسؤلية
نجاة : انجبي ولا تحاجيني هيج على اساس انتي شلونج تخرخرين مسؤلية
نرمان : ما سويت تصرفاتج
نجاة : حبابة خل نصالح والله روحي طكت اليوم بدونج حتة لكمة ما اكلت .. تقربت ابوسها
نرمان : لا وخري لا تبوسيني مريضة خاف اعديج
نجاة : شبيج
نرمان : ما ادري بلاعيمي ومصخنة وراسي وكلشي بية
نجاة : يا عمري والله احبج نونو لا ازعلين
نرمان : باوعتلها صفح .. ماشي
نجاة : بعد ما حجيتي ويا حكيم
نرمان : برطمت .. لا حاضرني
نجاة : اي عوفي هل يومين بلكت ينسة ويحاجيج
نرمان : وانتي هم ميحاجيج
نجاة : رحت اعتذرت منة بس ما قبل وطردني وطيح حظي بلكت يبرد واروحلة
نرمان : ان شاءلله .. عادي ابات بغرفتج اليوم
نجاة : اي نامي بيها اني راح انام فوك يم نزار
نرمان : ليش متباتين يمي
نجاة : يردوني فوك علمود قبل الاذان اسويلهم سحور
نرمان : ها براحتج ..
نجاة : راح اصعد فوك اتمدد يمهم اذا تريدين تعالي يمنة
نرمان : لا خليني روحي الله وياج .. كمت طببت الغرفتهة وسديت الباب تمددت بيها تقريبا ساعة مابيها شي كعدت العب بالمبايل لعبة .. ورا شوية كام الضوة يطفة ويشتغل فتحت الباب اشوف منو برا البيت مابي نفس .. للحضة فقدت من الخوف كمت ابجي واشهك فتحت مبايلي اريد اخابرة لكيتة حاضرني من كل البرامج .. استسلمت ورحت نمت بالصالة
ثاني يوم الصبح "
نجاة : طبيت للهول شفت نرمان نايمة على التخم دغيتة بجتفها .. يمعودة شعندج هنا كومي
نرمان : هممم هسة شوية واكوم
نجاة : كومي راح يجون الولد حتة ضهرج طالع
نرمان : كمت مفزوعة اغطي بنفسي .. عمو وين
نجاة : ما ادري من الصبح طلع
نرمان : هزيت راسي وكمت .. ضلينة نحوس بالبيت طول اليوم سوينة فطور وجبرتني اكعد وياهم فرشنة السفرة وحضرنة كلشي .. شفتة طب .. كلبي كام يدك سريع .. كعدنة على السفرة صرت كبالة وهل مرة ما رفع عينة ولا باوع علية كئنما مموجودة ..
حكيم : اقرو الدعاء قبل لا تفطرون
نزار : اللهم يا قاضي الحوائج اقضي علينا
نرمان : متت من الضحك وحكيم كام يخوزر بي ..
حكيم : يعني فطور وما جايبات مي
نرمان : كمت بسرعة جبتلة واجيت مديت ايدي انطيهيا ما اخذة وضل ياكل .. كلها انتبهت على تصرفة
كمال : البنية واكفة اخذ المي منها
حكيم : كوم باقر جيبلي مي
نرمان : رجعت المكاني كعدت وكلها تباوع علية .. اتصنمت من الخجل
اصيلة : جا بعدنة على البر اذا ما تريدها خل انطيها للمدرس لا توغف على كلبي ..
نرمان : رفعت راسي اشوفة ياكل وساكت .. خفت من كلام عمتي لا يسويها صدك ويزوجني
نزار : بوية بعد 4 ايام ونعيد .. حضر روحك ابو علي ورا العيد نشوف صخام وجهك
نجاة : لا ان شاءلله ناجحة
فاروق : بوية كلبي مفرفح شوكت يخلص رمضان
حكيم : حتة ترجع النشاطاتك المعنوية
نزار : ماعندة شخصية الما يشرب عرك
فاروق : ماعندة شخصية
حكيم : باقر كوم جيب الصوندة خل اقوي شخصياتهم
نزار : لا بالعباس جذب
نرمان : عفت الاكل وكمت طبيت للمطبخ روحي طاكة .. شوية واجتي اسراء شايلة المواعين الفارغة
اسراء : سوي جاي لاضلين صافنة
نرمان : رحت سويت جاي وصبيتة ورحت اقدمة بالهول وصلت يم عمو اخذة وعينة على كمال يسولف قدمت الفاروق
فاروق : ما اريد رجعي متعرفين اسوين جاي
نرمان : هزيت راسي واخذتة وديتة للمطبخ ..
_مرت الايام وصار ميديرلي بال اكثر رجعت ابات بغرفتي .. حسيت اني بدونة ولا شي بمجرد يشوفو ميحاجيني يستغلوها فرصة ويئذوني .. خلص رمضان واليوم اول يوم العيد .. كعدت الصبح سبحت وبدلت ولبست حجاب .. طلعت برا لكيت البيت مكلوب كلاب نسمة ورحاب وعماتهم وبيت عمامهم اغلبيتهم ما اعرفهم
_ صباح الخير
الكل : صباح النور
نرمان : ضليت صافنة على كمية الناس .. ذولة كلهم راح اعايدهم ؟ .. شفت نجاة كامت باتجاهي
نجاة : تعالي نونو خل اعرفج علي بيت عمي
نرمان : ابتسمت ورحت وياها ..
نجاة : هاي باجي فاتن مرت عمي سامي وهاي رشا بتها الصغيرة والباقيات مزوجات ميجن
نرمان : اهلا وسهلا خالة .. بوستها وعايدتها هيو وبتها
نجاة : وهاي مرت عمي نضال وهاي نجوى بتها متزوجة وعدها 3 جهال
نرمان : هم بوستهن وعايدتهن شفت نسمة ورحاب ؤحت سلمت على رحاب وعفت نسمة الجلبة .. كعدت بمكاني .. شوية وطب حكيم سلم عليهم وبدة يوزع عيديات للجهال والخواتة .. ما ادري شلون اجت عيني بعينة برطمت بوجها كبل اندار وطلع
نسمة : ههههههه جا ما انطاج عيدية
رحاب : حبيبة اكيد مو كدامنة ذيج العيدية الثكيلة
نجاة : يمة متكدرن اذا متحشرن رواحجن
نسمة : يا وشكلنة قحط هية ورجلها
نجاة : احترمي نفسج تاج راسج حكيم
نرمان : كبر وين ما اكعد يغثوني كمت اساعدهم بالمطبخ بالغدة لان عيد وكلها جاية على الغدة ما خلصنة الة واحنة هلكانين .. صبينة الغدة ودينا للنسوان والزلم طبخو برا ..
_ ماصدكت شوكت تغدو وراحو ..
اسراء : اكلج عيناي رمضان كلة مكركة بغرفتج وضاربة چادر المواعين كلهن عليج هسة
نرمان : ماشي
نجاة : لا والله مو خدامة عندج مواعين الكاونتر كلهن وصخات تريدين اشلعين جتفها كلنة نتعاون وكلنة نغسل مواعين ونسفط
اسراء : اني العيلة بلغتجن اريد اروح انام وارتاح
روان : امشو اني اساعدتجن
نرمان : طبينة للمطبخ نغسل مواعين سمعت واحد صاح
نزار : يالله يالله سون مجال
نرمان : شهكت من شفت الصواني الجايبيهن ذبوهن بالمطبخ
نزار : يلا غسلن
نرمان : وكفنة نغسل وصدك ايدي وكعت من الجلف .. كملت ونشفت ايدي رحت للغرفة ذبيت حجابي وبعد ما طلعت
_ لليل وهم رجعت الكهرباء تطفة والمبردة بس هل مرة صار صوت مال بزون فززني وكف كلبي خلاني اطلع اركض من الغرفة .. اجة بوجهي فاروق
فاروق : الله الله هاي شنو مطورة صايرة تفلينة وطلعين
نرمان : انتبهت على روحي بلا حجاب وما اكدر اجر نفس لزمت كلبي بخوف .. اءءء اكو اكو بزونة بالغرفة
فاروق : وهلي البزونة هيج اسوي
نرمان : عفية دير وجهك جريت خاولي لكيتة كبالي وحطيتة على شعري وايدي
فاروق : خاف حكيم بعد ميفيدج وادورين واحد لاخ يحمج ترا احنة بالخدمة ..
نرمان : شكد ما محترم انتة
فاروق : اوووي يابة
نرمان : نصة علية مبتسم لفحتني ريحة نفسة عرفتة شارب لان ريحتة غريبة ..
فاروق : تريدين اجي وياج نشوف البزون سوة
نرمان : ابتعدت عنة وطبيت الغرفتي رجع نفس الصوت يطلع غمضت عيني اخاف اشوف شي موزين للحضة ضعفت و كمت ابجي لزمت صدري وكعدت بالكاع .. فززني صوت الباب من اندك بقوة كمت فتحتة
نزار : لج نرمان بيج شي
نرمان : شكو شبيك
نزار : صوت صراخ طلع من غرفتج رج البيت نزلت من فوك اركض .. بيج شي ليش اصيحين
نرمان : اني اني ما صيحت والله
نزار : يا ولج صوتج السابع جار البيت ارج رج
نرمان : لبست حجابي وطلعت ارجف .. والله ماصيحت منين سمعتو الصوت خاف مو من غرفتي
نزار : ما ادري اذا تريدين تعالي يمنة فوك باتي اليوم وخل نشوف شنو سبب الجاي يصير بهاي الغرفة اسم الله خاف بيها مس شيطاني
نرمان : بصدمة .. مس شيطاني لا عفية لا تكول هيج اخاف
نزار : امشي لا تخافين
نرمان : رحت ويا صعدت فوك طبيت وكلت .. السلام عليكم .. محد جاوبني غير نجاة
نجاة : وعليكم السلام
نرمان : كعدت بصف نجاة نباوع تلفزيون
فاروق : ماعرفتو شنو مصدر صوت الصياح
نزار : ما ادري اتكول مو اني صيحت
فاروق : اليدري يدري والمايدري كضبة عدس
نزار : شني هاي
حكيم : ما سامع بيها ؟
نزار : لا
نرمان : باوع علية وكام يسولف النزار
حكيم : هاذة اكو رجال عندة بنية يثق بيها ثقة عمياء بيوم طب عليها للغرفة لكاها ويا واحد مثل ما ربها خلقها الاب تخبل جر سلاحة وركض ورا والولد الطفر من الشباج .. يركض والاب ورا والعالم شافتهم ركضت وياهم على الواهس لمن لزمو للولد كامت العالم تسئل هاذه شمسوي حتة نعرف يستحق نكتلة لو لا حار الاب شيجاوب يكول الصدك ويفضح بتة وينزل راسة بين الوادم لو يسكت ويستر على روحة .. اخر شي كال .. يابة لكيتة جاي يبوك كونية العدس مالتي فالعالم كامت تضحك كالولة يمعود تكتل روح علمود كضبة عدس .. جر حسرة الزلمة وهز ايدة وكللهم .. اليدري يدري والمايدري كضبة عدس
نزار : ها افتهمت
نرمان : عرفتة يقصدني كمت ابلعم ونجاة كامت تكرص بية
نجاة : سمعتي السالفة
نرمان : اي سكتي لا تبينين الة عرفنة يقصدنة
نجاة : لا ذكية
نرمان : سويت روحي صافنة على التلفزيون بس بداخلي احرك بروحي .. شوية وكام طب الغرفتة ..
نجاة : اني راح افرش بالهول افرشلج وياي ؟
نرمان : اي
نزار : هلااااا اليوم للصبح راح يبدي فلم شكاكي
نجاة : اطلع اشتريلنة
نزار : الصراحة اني مشتري الروحي وهسة لو تعالجن كدامي ما اطلع .. نصيحتي الجن طبخن تمن ومركة ومزمزن بيها
نجاة : انتة تاكل حلويات واحنة تمن ومركة
نزار : والي تباوع اكص ايدهة
نجاة : ههههههههههههه قصدك الي تمد ايدها تكصهة
نزار : لا الي تباوع اكص ايدهة
نرمان : كاااافي راح تتعاركون
نزار : اوي حجية فتنة ازعجناج
نرمان : احم .. شعجب عمو طب ينام من وكت
نزار : الفجر طالع البغداد
نرمان : هاا صدك
نجاة : همست الها .. لج استغليها فرصة بلكت كلبة يحن علينة
نرمان : يحن ؟ بعد القصة الحجاها ما اتوقع مبين كلبة مورم
نجاة : جربي متخسرين شي
نرمان : صبري ما ادري خل افكر
نجاة : تفكر ام الوصخ
نرمان : اشش سكتي خل اسمي باسم الله واطب .. رحت اتمشى بالممر وكلبي يريد يطلع من صدري .. دكيت الباب سمعتة صاح
حكيم : منووو اريد اناااام
نرمان : احم اني نرمان .. سكت ثواني وصاح
حكيم : شتريدين
نرمان : اجرئت وفتحت الباب .. شفتة متمدد وبيدة مبايلة بس شافني كلب وجها .. عادي ادخل ؟
حكيم : لا طلعي برا وراية طريق
نرمان : كمت ابجي حجيت بصوت مبحوح .. حباب لا سوي هيج والله اسفة وبعد ما اعيدها اذا عدتها شتريد سوي بية
حكيم : شكم مرة كايل .. اكره الاسف
نرمان : شنو اسوي لعد واسامحني جاي اكلك ما اعيدها واني مالي دخل كلة من نجاة
حكيم : ماكو شي اسمة كلة من نجاة انتي عندج عقل ومسؤلة من نفسج ومسؤلة على تصرفاتج نجاة لا جارتج بحبل ولا ضاربتج على ايدج بس هاي هيلكة وهمرعة واستهتار واني هيج تصرفات ماتعجبني
نرمان : بعد ماعيدها
حكيم : هاي اول مرة ؟
نرمان : قررت ما اجذب علية .. لا هاي ثاني مرة
حكيم : ثاني مرا اطلعن من البيت بدون ما ادري ؟
نرمان : نهض من الفراش وجهة ميكصة الطبر تقرب علية لزكني بالحايط .. وضرب الحايط بقوة
حكيم : تعرفين ليش ماراح امد ايدي عليج !
نرمان : هزيت راسي بخوف .. لا
حكيم : لان ما جذبتي .. ونجاة حسابهة بعدين
نرمان : ما اعيدها
حكيم : تدرين ليش اني معترض على طلعتجن وحدجن .. مو استهزاء بيجن لو قلة ثقة لااا لاكن من خوفي وحرصي عليجن لا سامح الله اذا تعرضلجن واحد بالشارع لو حاول يعتدي عليجن لو تنخطفن ويبتنزني بيجن شراح يكون موقفي شراح يصير بية .. نرمان افتهمي عاد
نرمان : برطمت .. صحيح
حكيم : شوكت عقلج يكبر .. مو شلعتي كلبي
نرمان : سامحتني ؟
حكيم : ممنوع اجذبين علية بعد واذا تختنكين وتريدين اطلعين كليلي اني اخذج ..
نرمان : التوبة والله
حكيم : يلة روحي نامي خليني انام
نرمان : اخاف انام جوة
حكيم : والمطلوب
نرمان : راح انام يم نجاة ونزار
حكيم : لااااااااا تعالي هنا نامي
نرمان : مسحت دموعي وابتسمت .. رحت تمددت على الجرباية ونمت بصفة .. عادي احجي وياك
حكيم : احجي
نرمان : غرفتي بيها جن شلون اطلعة .. بس كلت هيج شفتة خرب من الضحك .. شبيك شكلت قابل
حكيم : تريدين اطلعة ؟
نرمان : اي .. شفتة يضحك
حكيم : متخترعين
نرمان : لا من اطلعة ما اباوع
حكيم : اكيد
نرمان : اي بس خلصني مو والله كلبي وكف .. باوع علية جر شورتة يريد ينزع .. عطت هااااي شنوووو
حكيم : جا مو كلتي ما اخاف
نرمان : استغفرلله ..
حكيم : جا هسة شلون بالجني
نرمان : ما ادري باجر اذا رحت البغداد اني وين انام .. ضيق عينة وباوعلي ..
حكيم : معقولة المبردة مسكونة
نرمان : ما اعرف هية المبردة تنسكن بس شلون طبولها من الحلفات
حكيم : عدهم واسطة ويا الطوافة .. هههههههههههههههه
نرمان : ليش تضحك ترة صدك اخاف والوضع مينسكت علية
حكيم : ادري بالوضع صاير فيطي .. راح اكلج معوذة بس تقريها بعد ميصير شي بالغرفة
نرمان : تنهدت .. كول
حكيم : اقري الفاتحة
نرمان : غمضت عيني وقريتها .. وبعد
حكيم : صلي على محمد
نرمان : وبعد
حكيم : ميلت راسي .. بوسيني وعايديني
نرمان : فتحت حلكي مصدومة .. اءء كل عام وانتة بخير ان شاءلله حجي .. صفن بوجي ورفع راسة يحجي ويا رب العالمين ..
حكيم : استغفرلله يارب هية تجبرني .. عاب هل حلك الاهدل
نرمان : شكول لعد
حكيم : كولي ان شاءلله عريس غمزتلها .. ان شاءلله النسر يفطر
نرمان : ان شاءلله النسر يفطر .. شصار على الجني ؟
حكيم : صبري خل احاجي ..
نرمان : عمووو تضحك علية
حكيم : طاحضج زعل
نرمان : بصدمة .. منوة
حكيم : الجني
نرمان : باستهزاء .. وهسة شلون اراضي
حكيم : يريد شفطتين ويطلع من غرفتج .. ثواني خل اسمع شيكول .. هااا يكول لو اني اشفطها لو هية
نرمان : ايييع اسم الله ما اريد
حكيم : يمعودة انطي شفطتنين لا يصير جن عاشق وميطلع الة يم حجي ثقب
نرمان : ضيقت عيني بمكر .. تضحك علية صح
حكيم : اهووو باع هاي هسة تريدي يطلع لو لا
نرمان : لا خلي يبات بالغرفة اني راضية
حكيم : مو صوجج يلة كومي ولي الغرفتج
نرمان : كمت اريد اطلع صاح ..
حكيم : اوكفي اوكفي .. كمت طلعت 100 دولار من بنطروني .. هاج بوية هاي عيديتج
نرمان : خجلت من تصرفة .. لا ما اريد شكرا شموخي ميسمحلي اخذها منك
حكيم : منو هاذة شموخي .. على العموم براحتج
نرمان : اخذتها من ايدة قبل لا يرجعها .. لا عمو ما اردك خير ومدت ايدك
حكيم : ادب سز يلة بوسي
نرمان : تقربت بستة بخدة وطلعت فرحانة من الغرفة لان صالحني .. سمعتة يكول
حكيم : والله لانعل ابو شكلج
نرمان : ههههههههههههههه
نجاة : فرحينة وياج
نرمان : صالحني صالحني
نجاة : يوم الالي .. يلة تعالي نامي يمي
نرمان : لا راح انزل الغرفتي عموشي ميرضة
نجاة : فتحت حلكي بصدمة صرنة اني ونزار واحد يباوع للاخ .. عموشها ؟
نزار : جا عموشتي وين اني
نجاة : خاب انتة حقوقي بس اني لا هدف ولا عموشات وما ادري ليش عايشة
نرمان : متت من الضحك .. نزلت جوة طبيت الغرفتي مابيها شي عرفت هاي سوالفة تغطيت ونمت .. مرت الايام مرتاحة بيها نوعا ما بيوم جنت كاعدة بالهول طب مبتسم ..
حكيم : نصيت عليها ولزمت حنجها .. يتبع ..