قيس هشام :- بالهوى طاير بالهوى طاير شعرك سواد اليل بالهوى طاير خلاني حاير حسنك ياروح الروح خلاني حاير .. بعيوني اضمك
_ كمت اسمعها وارجع اعيدها مبتسمه وشي بداخلي يرفرف من السعاده دزيتله
_ عمو كلبي رفرف وطار من حنيتك ... مارد مرت ربع ساعة ورجع دز
_ تنكص ايد امج المدته على شعرج
_ حسيت حلكي انشك من الابتسامه دزيتله
_ بعد ماكصه
_ عفيه وليدي يله طفي مبايلج ونامي
_ طفيته وتمددت نشفت شعري على المخده وكمت اطلع غصل العب بيهن لحد ما غفيت ثاني يوم هم وصلني الدوام والطريق كله ماحجينه شي للضهر اجه يرجعني صعدت ويا
_ الله يساعدك
_ ويساعدج نونو
_ ابتسمت .. اليوم ما صار عندي ألم الحمدلله
_ الفضل للمسكنات ..
_ فتح الجكمجه وطلع سرنجه وابره كزاز حطهن بصف الكير .. بلعت ريكي بخوف شنو ذني ؟
_ راح اخذج اضربين ابره اليوم ان شاءلله وبعد اسبوع بس 4 عندك بسيطات
_ بس اني اخاف ماحب ما اضرب ابر
_ هوا منو يحب يضرب ابر ؟ هاذه علاجج لتتمقلجين نونو هيه جكه ابره متحسين بيها
_ صرت ارجف .. فجئه وكف يم بيت مكتوب عليه لافته مال مضمد وقابله
_ يلا نزلي
_ اءء ليش جايبني هنا
_ طبي للقابله ضربيه وتعالي يله بابا لتعطليني عندي شغل اريد اطلع _ نزلت خايفه انطاني الابره وياه 5 الاف حته ادفع ضل واكف بالباب وطبيت جان مفتوح دكيت الباب الداخلي فتحتلي مرة متوسطه العمر
_ عندي ابره اريد اضربها
_ ثواني .. طبت شويه وانفتحت باب ثانيه بالحديقه دخلت شفت سرير وبصفه ادويه ومكصات بلعت ريكي وانطيتها العلاج .. حبابه على كيفج وياي
_ هيه جكت ابره شراح اسويلج يعني اكص راسج
_ انغثيت منها .. لااا مو اكو ميفتهمن ويضربن ابر .. بس حجيت هيج صارت اعصاب
_ اني جنت اداوم بالطبابه العسكريه بزمن صدام لواء بالدوله اعالجهم وايدي خفيفه محد يحس بيها جان عميد ميرضى واحد يضربه ابره غيري بس تقاعدت وكمت اشتغل هل شغله الجايفه
_ صفنت عليها متقاعدة ؟ شكلها عبالك وحده عمرها 20 سنة انوب سطرت راسي بطولاتها
_ يله انداري
_ درت وجهي وماحس غير ضربتني داست بالابره ضليت صامده خلصت واخذت الفلوس ورجعتلي الباقي اثناء مجاي تكمل بطولاتها قاطعتها
_ اني اترخص اهلي منتضريني برا .. طلعت شفت عمو عيونه بكصته وميتحاجه
_ شبيك عمو
_ انفجر بيه :- شنوووو وين وليتي عبالي نمتي يمهم انييييي مو كتلججج عندي شغلللل اريد اااااولي
_ اني شعليه غير هية وكفت تحجيلي قصت حياتها
_ متكولين اااااكو مطي منتضرررررني براااا
_ حشاك ..
_ مشى بسرعه وصلني للبيت بس نزلت رجع طلع بالسياره مستعجل اول ما دخلت اجت عمه اصيله بوجهي
_ اشرقت وانورت هلا بسورها ونورها .. شنوووو جان عندج درس اضافييي ؟
_ جنت اضرب ابره ..
_ ابرة ماليش
_ اهوووو شبيكم كلما كلت اروح للدكتوره لو عندي علاج تتخبلون يعني اني وحد ما اتمرض
اسراء : اني اول مرا اسمع ببنيه عدها تكيس ادري بالتكيس عند المزوجات يعني عد وحده مو بنيه حجتها بحديه
_ والله اذا انتي جاهله ومتفتهمين اني شنو ذنبي ؟
اصيله : ولج منين جبتي هاذه السان اجيتينا جنج فاره دايس عليها قطار كلمتين سوه متعرفين تحجين
_ الدنيا علمتني عمه .. اني اريد افتهم انتي ليش هيج تعامليني اني شمسويتلج فوك ضليمتي ابوي مات وامي عافتني .. يعني اقلها اذا متحنين عليه حني على اخوج الميت وكولي ثواب الروحه اعوفها بحاله
_ طركاعه لفت راسج يالمضلومه اني المضلومه مو انتي شو ارقه لبس تلبسين وطلعات وطبات ويا عمج حكيم غير المنعرفه
_ عفته جاي اطلع لزمت ايدي ولوته بالعكس الضهري اااااااه اااااااااه عمممممه ايددددي
_ ولج اني لو اريد اكنس بيج الشارع انتي وعمج حكيم بس اني هسه سااااكته وعايفتكم براحتكم
_ اجت روان تبعدها عندي ضربتها بعكس ايدها على صدرها .. وخررري لج بت الزمال خايفه عليها
بسمه : ولجن هاي لو منج يما الا اخليها خدامه شو انتي عادي عندج هاي المكوده اذكرين نجاة من جان يسبحها ومنكدر نحجي لان اخته بس هاي بت اخوج احطها وادوس بطنها
_ ولج ابطن منو ادوسين ؟
_ التفتت اشوف فاروق واكف وبيده سويجه يفر بي
نسمه : ابطن اخوك لان طلعها من ماعونها
فاروق : هاااا كلتيلي
_ واكف يسولف ابرود لحد ما نزع الحذاء ومنشوف غير كامن يطايرن على نسمه
نسمه : امددداكم راح تموتون عليها الله يعلم شمستفادين منها
فاروق : ابتسم بخبث .. لو مستفاد منها جان ماركعتج بالحذاء
اصيله : عبالك اسكتلك يجون ولدي ويصرفون وياك ..
نرمان : كفختني على راسي
اصيلة : طبي جوه ام الشوارع
فاروق : ام الشوارع اهون من هجامات البيوت
نزار : طبيت اركض على صوتهم .. هاااي شكو شصاير
نسمه : بجي وعياط .. هاي هاي الجلبة يطردوني منوراها
نزار : منيه
_ قندران
نزار : ولج اصيله انتي كافشه نرمان ؟
اصيله : واكسر راسها انته ياهو مالتك
نزار : كفشج البين وعزاوين .. واني اكول هاذه السم منين جاي ينزل اثاري باجي اصيله جاي اضخ
اسراء : احجي عدل ويا عمه هاي تاج روسنه
نزار : تاج راسج انتي مو اني فتون علف سدي حلكج لا افضحج كدام الوادم ام الخبط
فاروق : هدددي البنيه اصيله .. كبل هدته طبت نرمان تبجي وتعدل بملابسها ..
نزار : اكو واحد عنده اخت مثل نسمه ويضربها بالنعال
نسمه : اي والله
نزار : المفروض يضربها بالمنجل ويفتح راسها
فاروق : هههههههههههههه لا هاي جرعه تصبيرات انطيتها علما يجي حكيم
نسمه : لا بداعت ابوي لاتكله والعباس ابو فاضل ماعيدها
نزار : دجيبي 10 وماخلي يكله
نسمه : منيلي غير كتلني وذبني مايريدني عايشه على نكوط الحب الينطينياهن نجم
فاروق : تنهدت .. عود كولي هل حجي الحكيم
نزار : يله خيتي نسمه اني صاعد انام ديرو بالك على العراق بين ما اكعد ..
فاروق : اخذني وياك الكعده هنا تكصر العمر
نرمان : طبيت الغرفتي ابجي ليش لازم اتفشل وانقهر دائما ليش ما الي فرحه تكمل من وجع الوجع ومن حزن الحزن كعدت اندم بحضني وابجي كاتمه نفسي ما اريد واحد يسمعني ويشمت بيه
_حطيت راسي على المخده بدون ما ابدل ماحسيت على نفسي غير نمت للعصر كعدت فتحت كتبي قريت شويه وراها قررت اراسل نجاة اسئل عليها فتحت مبايلي ودزيتلها
_ شلونج حبيبتي نجاة طمنيني عنج .. ماردت عفته بدون ما الح خاف المبايل بيد زوجها اخذت ملابس طبيت سبحت وطلعت شربت علاجي بدون ما اكل شي شويه واجاني اشعار
_ الحمدلله نونو انتي شلونج مشتاقتلج
_ زينه اكو احد يمج لو احجي
_ كولي
_ ضل بالي عليج اصالحتي ويا فلاح لو لا احجي الصدك
_ اي الحمدلله
_ يعني مرتاحه
_ اي ليضل بالج انتي شلونج اخواني شلونهم حبابة لتعوفيهم دائما نضفي بيتهم واتفقدي نزار اذا مماكل لان مرات يضل بلا غده
_ لا لتفكرين ابد شنو يردون جاي اسويلهم
_ اروحلج فدوه والله مشتاقه لكعداتنه
_ تعالي يمنا
_ لا ما اجي
_ براحتج حبيبتي
_ يله اني اترخص مع السلامه
_ الله وياج .. سديته وشمرته على السرير طلعت كعدت بالصاله شفت عمو كاعد يتفرج تلفزيون هوا وابو واخوانه كعدت اتفرج وياهم حاطي على اخبار ويسبون وينعلون بالارهاب شويه وطبت عمتي اصيله انطتني المبايل
_ هاااج امج تريدج
بصدمه :- امي اني
_ اي امج انتي هاااج راح يخلص الرصيد
_ اخذته منها ايدي ترجف وكلبي انعصر سمعتها تكول الو
_ اءء الو
حكيم : دغيت نزار .. نصي خل اسمع
_ نزلت دموعي لا اراديا واني اسمعها
_ حبيبه يما نرمان مشتاقتلج بنيتي الووو اسمعيني ووينج يمةةة
_ ليش يما لييييش هيج سويتي بيا هان عليج اذبيني من ايد الايد هان عليج انام يوميه بمكان
_ لاااا يما ميهون عليه بس الضروف حكمتني المهم انتي مرتاحه ابيت عمتج وان شاء لله اني بنص السنة اجي اخذج يمي بعد نعيش سوه
_ الداس بكلبي انها ماذبت دمعه وتحجي عبالك البارحه جنت كاعده يمها من حركت روحي سديت المبايل بوجها وانطيته بيد عمتي وطلعت افتر بالبيت روحي تلوب كمت افرفح واعض باصابيعي
_ اصيله : ولج سكط ليش اسدي بوجه امج خاف حلتلج الكعده هنا بس تجي عليج تروحين وياهة
نرمان : صرخت بحركه واعصابي انفجرت .. كااااافي يوميييييه اطرررديني عباااالج اني ماعندددي احساس عبااالج اني عاجبتني الكعده هنا اصلاااا انيييي بعد ما ابقه هناااااا خر* بهاذه البيت وباليكعد بي
_ طلعت امشي سريع من باب المطبخ امشي متوجهه للشارع كمت اسمع صوت صياح بالبيت ارج رج طلعت بالشارع ما ادري وين اروح كمت امسح بدموعي التنزل ماحسيت غير انسحبت من رداني
_ وووين ررررايحه امشي رجعييييي
_ عووووفني نزار ما ارجع بعد ماررررررجع
_ صوووتج لج لاصيحين منا العالم لتخليني امد ايدي عليج امشي طبي ماناقصين فضايح ..
_ عوووفني مخنوكه راح اموت راح اطك
_ زين تعالي نمشي مناك منا بساتين .. سحبته من ردانها باتجاه الشارع العالم اسمعه تبجي وتمسح بوجها .. كاافي عيب هسه شيفكرون ليش تبجين
_ طز بالعالم ميهموني بعد
_ تعاي ام السان خل ارجعج للبيت هسه نلكه عمج حكيم طابك عنده الحار والبارد .. اخذتها ورجعنه للبيت مشيتهة بالبستان ..
" احم على الاقل انتي سمعتي صوتها اني شفتها بعيني بس المشكله مو هنا
_ لعد وين
_ جر نفس بحسره المشكله شفت روحي بيها مثل المرايه العكست ملامحي بس الملامح لا اكثر ولا اقل الداخل اظلم
_ دمعت عيوني عليه حسيته غص بالحجي وغير الموضوع
_ شوفي هاي الجذعه زرعه حكيم وذني الخضورات ملات عمتج تحب تعلف سلك وجرجير فرش على الغده تعاي خل انكطعهن وانذبهن للدجاج
_ ليش حرامات
_ باعي هوا شي تافه بس بلكت يبرد كلبي
_ لا خطيه النبات كائن حي شنو ذنبها نحرمها من المي ونهمشها علمود عمتي
_ اويلي عليج نونو حتى النبات كلبج يحن عليه
فاروق : انته عليمن حارك دمك وراح تموت مو كتلتها وكدام ابوي ولدها .. صفك بيده حيل وصاح
_ ماشفه كلبي
_ تريد العدل .. عض شفته وهز راسه .. انطيها لامها هيه اولى بيها البنيه شافت ضيم هنا على الاقل امها ادير بالها عليها عليمن يو
_ قاطعته .. ما انطيها لو تطلع نخله بروسكم
_ لشوكت اضل هنا
_ الله كريم .. شويه وطبت هيا ونزار كعدت على التخم مرتجي ضلت واكفه بالباب تستحي اطب
فاروق : واكفه قصاص
نرمان : طبيت كعدت يمهم
نزار : حكيم اني راح اروح للاسواق تريد شي
حكيم : لا
نرمان : طلع نزار وكام فاروق طب الغرفته وقفل الباب حته عمو كام طب الغرفته وسد الباب ضليت بالهول وحدي شويه واجه نزار جايب حلويات وببسي طلعهن وجاب كلاصات ثنين بيهن ثلج صبه وكعد بالكاع كلب التلفزيون على مسلسته التركيه
_ هاي نفسها مال ذاك اليوم؟
_ اي بس لتخافين هاي الحلقه مابيها حل***
_ باوعتله بخزره و درت وجهي بتجاه الباب واكل كيك اذكرت اليوم عندي واجب ومقاريه كمت اريد انزل
_ وين رايحه اوكفي
_ اريد جنطتي مال مدرسه عندي قرايه
_ ضلي هنا اني اجيبلجياهن هسه عمتج ت**** بس اشوفج
_ نزل جابها واجه انطانياهة
_ هاج هاذه مبايلج شفته واكع بالكاع
_ اخذتهن منا شكرا نزوري
_ لا بشرفج لصيحيلي نزوري احس روحي سمجة ابو خريزه
_ هههههههههههه اكول هاي ريحته الزفر منين طالعه
_ من حلكج ام الزفر
_ شفته تنرفز كعدت اقرة كملت وكمت افتر بالبيت ضوجه طبيت للمطبخ جبت خيارة وكعدت اكل
_ الله جيبيلي وياج وحطيلي عليها ملح
_ كمت جبتله ورجعت هاك .. ضلينه نتفرج تلفزيون سمعت مبايلي اجاني اشعار على مبايلي فتحته
_ وين انتي
_ يمكم بالبيت
_ نزلي جوه راح يجون اهل رجله النسمه لصعدين فوك علما يرحون .. سديت المبايل وكمت اخذت ملابسي وطلعت سبحت طبيت للهول شفتهه بعدها كاعده
_ ولج شكتلج اني
_ العفو .. كبل كامت طلعت
حكيم : نزار انته هم بدل وانزل واذا فاروق كعد خل ينزل راح يجي رجل نسمه يرجعه
نزار : بهليل ؟ متوازي
_ دكوم بلا حجي زايد .. نزلنه اني ويا بالهول لكيت كمال ونجم هم كاعدين باوعت على نجم من فوك ليجوه
" باقر عمو "
باقر : ها عمو
حكيم : عمك نجم بايك هدومك لو انته بايك هدومه
نزار : هههههههههههههههههه اي والكعبه
نجم : ليش شبيه واصنفون لو مشايفين واحد حضري ومثقف
حكيم : ليش الزلمه الحضري الحوك يلبس شورت اصفر وتشيرت وردي جنك قلم ملاحضات ..
نجم : اكل اليعجبك والبس اليعجب الناس
حكيم : فاهم المثل من *** كوم بابه كوم بدل لاضحك الوادم علينه واذا اضل كاعد بغرفتك بعد احسن
نجم : الكعده مال اختي وما احضر امدا الشوارب الشايلهه
نزار : اول مرا تحجي حجايه بيها خير
حكيم : دغيته انطم واسكت لا اهده عليك
نزار : هههههههه ميخوف اصيله العفو جلبي
كمال : احم يابه نسمه تريد نشرط عليه بيت وحده يلا ترجع
نزار : والله اغبر اذا قبل
كمال : جا شلون نخليها عدنه العمر كله
حكيم : بالاول وبالاخير الكلمة الرجلها .. مرت ساعة واندكت الباب استقبلنا الرجال فطير كلش لا يحل ولا يربط شوره بيد امه ونسمه لاعبه عليه جقه شبر انحلت وكال من الله يمكني اطلعه بيت وحدها اخذها وراح ..
_ تعشينه جوه وصعدت فوك جان الوكت متئخر راسلت نرمان
_ اخذي علاجج ونامي لضلين كاعده
،نرمان : شفت رسالته مسحت دموعي .. حاضر .. طفيت المبايل وكامت تجي اشعارات ما فتحتها كام صوت امي يرن باذني مجاي اكدر انسى برودها وياي ولا السوته بيا عمتي كعدت بالكاع حضنت رجلي الصدري بجيت علما حسيت نفسي ارتاحيت طلعت البيت فارغ الكل بغرفهم طبيت للمطبخ سويت لفة مال جبن اكلتها ورحت شربت علاجي فتحت رسائله
_ نونو اقري سورة المزمل 10 مرات واني راح اقراها الج 10 مرات بنية الشفاء ماشي مو تنسين نبلش بيها هسه
_ الو ليش متردين
_ دزيتله عمو راسي يوجعني اريد انام باجر اقراها .. مباشرا دزلي .. براحتج .. طفيته وتمددت احوس بالفراش لحد ما غفيت الوكت متئخر
" ثاني يوم دك المنبه طفيته كعدت وضليت فاتحه عيني ما اريد ادوام ضليت بالفراش سمعت الباب اندكت كمت فتحته وصرت ورا الباب
_ صباح الخير .. وينج اتأخرنا
_ صباح النور .. ما اداوم اليوم
_ اكدر اعرف السبب
_ ماحس نفسي جاهزه اشوف ناس وابتسم بوجهم تعبااانة عمو
_ سلامت كلبج من التعب ارجعي نامي راح اوصل نزار وارجع
_ الله وياك .. سديته الباب ورجعت لفراشي ماتحركت ولا عيوني رمشن قريب ساعة واجتني رسالة فتحته
_ صعدي فوك انتضرج
_ بدون مارد لبست حجاب ويا التراك طلعت من الغرفة وسمعت عمتي اشمر حجي
_ هم يعجبه الذبان ****
_ عبرته وطلعت فوك انتبهت عليها طلعت ورايه تباوع صعدت شفت الباب مفتوح طبيت جوه سمعت صوته من المطبخ
_ سديها وراج .. سديته وطبيت للمطبخ لكيته مشغل فيروز ويغني وياها ويحضر بالريوك وهديتني ورده فرجيتا لصحابي خبيتا بكتابي زرعتا عالمخده شال ورده من المزهريه قدملياها مبتسم هديتك مزهريه لاكنت اداريا ولا تعتني فيها تا ضاعت الهديه ...
_ ضحكت ودنكت شميت الورده وكمت اكح
_ الله الله
_ هاي وين جانت ماكلها التراب
_ ضحك بصوت عالي ..شمدريني راح تندمجين وشميها
_ تعالي وراي شال الصينيه وطلع طبينه للصاله حطها على الطبله وكعدنا بالكاع شفت الاكل كيمر وكاهي ومربة فراوله وجبن وجاي
_ هاي المن هلكد اكل
_ النه اني وانتي شنو ولج خاف مو بعينج انه وغزاله
_ ابتسمت وضيقت عيني .. غزالة منو ؟
_ وحده
_ انعصر كلبي حجيت بهدوء .. حبيبتك
_ هز ايده اقرب من هيج
_ صديقتك ؟
_ بعد اقرب
_ شنو اقرب ماعندك اخت غير نجاة
_ اخ الله خشمي
_ شبي
_ شم ريحت ثول قوية سطرتني من الصباحيات
_ كمت اكل واباوعله بخزرات متعمده ..
_ شو كمت اشك بروحي ليش هيج تباوعين جنج واوي
_ الكمه بحلكي وحجيت غزاله منو ..
_ دبلعي لشركين .. ضحك واكل لكمه .. انتي
_ ياااا اني
_ اي
_ شلون بله وليش اشبهني بحيوان
_ ولج انتي مو صوجج صدك مال اشبهج بحيوان اطفحي واسكتي
_ سويت نفسي ضايجه كدامه بس بداخلي طايره من الفرح .. خلصنه اكل شال الصينيه وداها للمطبخ واجه كعد على القنفه الكبالي .. يكلب بالتلفزيون
_ تحبين احطه على شي اشوفين
_ لا ممتابعه شي .. كلبه حطه على قناة سعوديه تبث قران من بيت الله صوته كلش مريح للسمع
_ باوعتلها من فوك ليجوه لابسة تراك ضاب على جسمها .. ولج انتي شلابسه
_ شلابسة .. مارد
_ تنهد ورجع على التخم وغمض عينه مستمع للقران ضليت اباوع على طوله وضخامته الله مصلي على محمد وال محمد ماد جسمه من التخم لجوه الطبله طابة انتبهت على حفره برجله شكلها غريب عبالك الحم مغيط للداخل اول مرا اشوفها تشبه الغمازه ضيقت عيني اباوع عليها
_ يمعودددده كولي يالله وين جاي تباوعين
_ عمو هاي شنو برجلك غمازه ؟ بس كلت هيج ضحك بصوت مسموع وكام يهز براسه مكشر
_ جا بس اني غمازتي هنا
_ شمدريني .. لعد شنو هاي شو اني ماعندي
_ الله يبعد عنج كل شي نونو هاي مكان مال طلقة
_ ضربت على صدري طلقه انضربت
_ سمعي
الرجوع الى الماضي البصره سنة 2007
حكيم : كاعد بالهول انضف سلاح ابوي خلصت وشديته طب نجم
_ انطينيا اني لكمل تنضيفة
_ نجم روح بول ونام
_ وحق العباس اذا ما انطيتنيا من تكمل اخذه واطلع اصيد بي
_ اخذه بالكت الله يشيلوك الامريكان ونخلص
_ سمعت الباب تندك عفت السلاح على الطبله وطلعت اشوف منو رجعت للهول شفته لازمه ويحط تفال عليه ويمسحه سحب اقسام وكف يريد يصوب
_ نجم ترا ماكاعدين بالبر اكو عالم ودنيا اذا ضربت طلقه متلوم اله نفسك
_ مجاي تضرب شكلت .. يدوس على الزناد ومتضرب
_تقربت عليه اشوفها ما سمعت غير الصوت مالتها وشمر السلاح وكام يلطم على راسه لهنا اني ماحسيت بألم نزلت راسي اباوع على فخذي مرت ثواني معدوده وكعت بالكاع فقدت السيطرة على جسمي من الوجع
نجم : ولج يماااااا لحكييييني حكيم ماااات يمااااااا الدم غركه خلص ددددددمه .. طبو امي وابوي وكمال ورجل رحاب يمنا شالو حطو على القنفه حايرين بي
فاضل : كمال شغل السياره خل ناخذه وليدي راح يموت
كمال : بويه مانكدر انطلعه والامريكان مطوقين الشارع
ياسر : عمي خل نجيبله مضمد للبيت راح يخلص دمه
كمال : طلعت اركض .. دكيت الباب على المضمد حجي علاء طلعلي ابنه
_ ابوك وين
_ طالع تريد شي
_ اخوي اتصاوب وراح يروح من ادينا اريد حجي علاء يسعفه
_ طالع موش هنا خارج البصره اجيكم انه
_ تعرف
_ اي اي بس خلني اجيب الجنطه .. طب شويه وطلع اخذته ورحنه للبيت
فاضل : بويه انته تعرف لو لا
_ اي عمي اعرف
حكيم : حط ايده على الطلقة لو روحي شاغت ... وخررررر ايددددك لا اكفررررر بيك
_ خويه ماعندي مخدر تتحمل وجع
فاضل : يتحمل بويه يتحمل
حكيم : غمضت عيني وكام ينبش بالطلقة يريد يطلع راسها واني اشتعل وانطفي علما طلعه وبده يخيط
_ توجعك
_ الخياط اهون بس كمل .. خلص الخياط وطلع غسل ورجع .. الطلقة مو غميجه جاية بفخذه ماواصله للعظم ان شاءلله مابي بس العافيه
_ابوي انطا حسابه وطلع طب ابوي بيده خيزرانه كام يضرب بنجم علما زوعه العافيه اخر شي وكع بالكاع وكام يبجي
فاضل : صاير سبع يالغمه تسابع على اخوك
حكيم : بويه ما ضربني متقصد
فاضل : ولك منوووو منوووو امك وازتك على اخوك احجييي رجع يضربه
حكيم : بويه رحمه على ابوك هويدر عوفه
فاضل : اخخ اخخ لو ما محلفني بالغالي .. اصييييله اصييييييله وجعه امي التنام بكلبج
اصيله : وكفت متخصره .. شتريد بعد ابنك وكام جنه حصان
فاضل : سوي برتقال واشوي معلاك الحكيم لا ادوس ابطنه وطلع ثربه من حلكه
حكيم : لزمتني الضحكه ضليت متمدد ويجيبولي صينيه ويشيلون صينيه كمت اذا اتمغط يركضون عليه خاف محتاج شي للمغرب طب فاروق يركض
_ حكيم مصطفى ابن عمه سرور ضرب نزار
_ كمت على حيلي اعرج طبيت للمطبخ جريت الصونده وطلعت للشارع شفته فاحط وكاعد على الرصيف .. منو ضربك
_ مصطفى
_ صحت على مصطفى تعااااااال .. اجه يركض يتلفت
_ انته ضارب نزار
_ اءء ماضربته جنه نلعب
_ جتفت ايده ثنين وضربته على خاصرته عاط وكام يجر بيده يريد يطفر جنزته كدام الجهال وعفته جاي اطب اجه بوجهي فاروق ركعته بصونده على ايده صرخ وكام يكز
فاروق : انيييي شعلييييه ليشش تضربني
حكيم : حته مرا ثانيه انته تاخذ حقه صاير بكد البغل ومن واحد يسويلك شي تجي عليه تعال اسندني ماكدر ادوس على رجلي ..
_ تقرب يفرك بيده ارتجيت عليه وطبيت للبيت كعدت على القنفة .. مرت ايام وبديت اتعافه وعلى كولتج خياط ابن حجي علاء صار غمازه
نرمان : ههههههههههههههههههه يستاهل نجم الكتلة
حكيم : ياريت الكتل بي فايده
_ بهل اثناء انفتح الباب ودخلت نجاة
_ مساء الخير
حكيم : يابه بنيتي اليوم يمي تقدمت عليها حضنتها .. شلونج بويه
_ بخير دام اشوف وجهك الله لا يحرمني من شوفتك رجعت حضنته بقوة شفت نرمان كاعده حضنتها وبوستها
نرمان : رحت جبتلها مي واجيت
نجاة : عاشت ايدج حبيبتي .. اليوم كاعدين سوه ونونو ممداومه
حكيم : اي راسها يوجعها ماخليتها اداوم انتي شلونج امورج
نجاة : تنهدت الحمدلله زينه .. لعد نزار وفاروق وين
حكيم : بدواماتهم
نجاة : مشتاقتلهم لعد راح اكوم اسوي غده حته نجتمع سوه فلاح ميجي اليوم عليه
حكيم : اخذي راحتج بويه
نرمان : اني راح اكوم اساعدها .. كمت وراها للمطبخ
_ هاي شنو عيني كيمر وكاهي وحركات
_ وخري من ايدج اني اغسلهن .. وكفت اغسلهن وهيا تحضر بالغده سمعت الباب انسدت عرفت عمو طلع بت تركب بالغده بس خلصت سحبتني من ايدي للهول .. يمعوده شبيج اوكفي
_ وكفت تتكاوت كبالي وتفرك بأديها
_ شبيج
_ نرمان ادري انتي مو حمل هيج مصايب والبيج مكفيج بس اني ماعندي غيرج اذا احجي لاي احد راح يفضحوني
_ شبيج نجاة احجي .. خوفتيني
_ اني حامل
_ حلفي
_ والقران
_ حبيبتي الف مبروك الله يقر عينج بشوفته
_ ماريده
_ بهتت ملامحي .. منو المتردي
_ الطفل لبطني .. كعدي خل افهمج
_ كعدت مصعوقه من الجاي اسمعه
_ من عرف فلاح اني حامل كلب الدنيا على راسي ميريد خلفه يكلي عندي ثنين مراويني نجوم الضهر انوب اجيبيلي بعد واحد
_ وانتي قبلتي تكتلين ابنج على حساب فلاح ميريد طفل
_ اني هم ماريده
_ لج انتي مخبله ابنج هاذه ابنج الله .. ضحكت باستهزاء يلا صار عندي عادي الجاي اسمعه امي ذبتني بعمر الورد انتي مذبين هاذه من بطنج بس اريد افتهم انتو شنو من امهات شنو كلوبجن حجرر .. فقدت عليها كمت اصيح وهيه تبجي
_ سكتي يمعوده الدنيا كلها درت
_ اني معليه عسا ما اجيبي واشمري بالشارع عادي انتن ماكو بكلوبجن رحمه
_ كااااافي نرمااااان احتررررمي نفسج زودتيهاااا وياي
" بهل اثناء طب نزار ضل صافن ويخوزر بينه ركضت نجاة حضنته وتبوس بي مسحت وجه قبل ليشوفها
_ شبيجن صوتجن للشارع
نرمان : ماكو شي جنه نشاقه
نجاة : خزرتها ورحت للمطبخ دكيت على حكيم اشوفه وين صار بديت احضر بالغده شويه وسمعت صوتهم اجو طبت نرمان تحضر بالاكل وياي خلصنه ونقلنه الاكل وكل شويه اشوفها تباوعلي وتصفن بوجهي
حكيم : شبيجن صاير شي قبل شويه اضحكن وتشاقن
فاروق : شكو نجاة خوما مسويلج شي فلاح
نجاة : ها لا لا كلشي مابيه
نزار : ياخبر بفلوس بكرا يبقا بلاش
نجاة : كعدنه ناكل بصمت .. خلصنه وشلت الاكل غسلت المواعين والتمينه بالهول كعدت بصف حكيم حضني من جتفي ويسولف وياي
_ مرتاحه بيت رجلج
_ هزيت راسي اي"
_ خوما مشاكل
_ لا ابد
_ عفيه بنيتي ماريد فديوم يجي واحد يشكي منج بست راسها وكمت ترخصت منهم عندي شغل لان باجر عندي طلعة البغداد
نرمان : تنزلت جوه طبيت الغرفتي وقفلت الباب بعد ماصعدت فوك العرفته نجاة العصر راحت مرت الايام واني اداوم وارجع للبيت تعبانه اقره وما اطلع من غرفتي وكل اسبوع اروح اضرب ابره اول شهر من العلاج تعدلت شهريتي رجعت للدكتوره سويت سونار كالت رايح التكيس بيومها كلش فرحت وعمو هم جان مرتاح
_رجعنه للبيت شفنه نجاة موجودة وتلوج وجها اصفر وملامحها باهتة سلمت عليها ودخلت بس شافت حكيم حضنته وكامت تبجي بحركه
_ شبيج نجااة
_ حكييييم كامت تكرر اسمه وتبجي وتحضن بي بعدها عنه يباوع على وجها شاف فكها ازرك لزمه يفرك بي
_ شبيييييي وجهج
_ حكيم ابني مات
_ فتح عينه بصدمه ولازم وجها يا ابن شتكولين انتي
_ فلاااح وكعه ضربني علما وكعه فقدت اعصابها وجرت ثوبها وطلعت اثار رجلها المتشوها من الضرب لونها ازرك اخر شي اندارت تشوفه ضهرها حته ملابسها الداخليه طلعت رفع راسه حكيم يباوعلها وملامحه تنفض شرار طب للغرفه شويه وطلع بيده سلاح نزل يركض من الدرج واني وياها انصيح
_ اووووكف عمووووو وين رايح نزلت اركض ورا جلبت بايده نترني وكعت شغل سيارته وطلع طب فاروق شافني ابجي والطم على رجلي صحت
" فاررروق الحكه راح يكتل فلاح اخذ سلاحه لتعووووفه ابوس ايدك .. كبل طلع بسيارته ورا عمو حكيم رجعت صعدت ورا نجاة واصيله وجناينها صعدن فوك يردن يعرفن شكو كعدت بالكاع نجاة ادك وتلطم
اصيله : ولج يمعزايه شداكه من دكه واخوج راح يذابح ويا الوادم
_ ماشوف غير نجاة كامت على اصيله وكعت بيها دك ضرب وين ميوجعها وذيج ترفح جواها
نجاة : كلبببببه حقيرررره الله لا يخليج ولج ماعوووفج اذا ما اشرب من دمج .. ماعفته اله لامن طلعت الدم من وجها سحبوني عنها اعصابي ترجف كمت افكر بحكيم اذا خسر شبابه بسببي عمري كله راح اعيش بندم مرت ساعات اشبه بالموت البطيئ لحد ما شفت فاروق طب لزمني من شعري ملخه تملخ بيده
_ك ***** ساقطه هووووا هاذه البعتينه علموده هاااذه الكتلتي روحج عليه ميريددددج ولج تدررررين من رحنه شسووووه شمر عقد الزززواج صك على سنونه وحجه يكول خل ترفع عليه دعوه واطلكها تعرررفين شنو معناها لو لا ... معناهة مستكثر بيج حته الحاضر والغايب بت الزماااااال اخذ منج الي يريده وشمرج
نرمان : كمت اريد افك شعرها من ايده علما هده تكطع كله بيده وهيا شبه انجنت ملخت روحه تملخ .. ابوس ايدك كولي عمووو وين
_ رجع ليورا يتنفس سريع حجه بصوت مبحوح .. هسه يجي
_ ضليت كاعده على اعصابي منتضره اشوفه سالم يلا يبرد كلبي لليل طب هوا ونزار بيده كانولا بس شفته ركضت عليه حضنتني من بطنه طببو الغرفته ماقبل ينام ضل كاعد على السرير يهز برجله ومنصي راسه سمعت صوتهم يتعاركون ويا نجاة تقربت عليه اذكرت من حظني كعدت بصفه وحطيت راسي على جتفه لزمت ايده البيها الكانولا وبستها
_ عمو انته مصخن
_ هز راسه ورجع جسمه على الجربايه متمدد كمت للمطبخ ادور على قطعه قماش اسويله بيها كمادات ماكو بس ملات الطباخ نزعت حجابي كصيت منا وصله وجبت مي بارد من البراد ورحت اسويله كمادات غمض عينه وملامحه ارتخت سمعت الباب انفتح اشرت النزار
_ اششش نام .. شلت الطاسة وطلعت برا يمهم لكيت كمال ونجم هم موجودين عدلت حجابي وكعدت بصف نجاة ضلو يحجون بسالفتها
كمال : باجر نسوي كعده ونطيح حضه
نجم : عليمن مرته وحر بيها عسما يذبحها دام هيه على ذمته احنه المفروض منشجعه ونكوي شوكتها عليه
فاروق : جني اني الراح اكوم اكسر راسك وشوكتك لضل تمضرط
كمال : معليكم بي بس اي الاريد اعرفه حكيم شلون يروح يفتح جتفه بالساطور
نزار : صدك منين جابه
فاروق : اني جنت شايله بالسياره وانطيتهيا واخذت المسدس
كمال : لا سبع مكان متكحلها تعميها
نجم : من احجي مترضون
نرمان : حسيت نجاة ادغني همست .. شبيج
نجاة : كومي وياي
نرمان : كمت وياها للمطبخ نزعت جبتها وشعرها مكفش نزلت عيني على دشداشتها سابحة بدمها
_ يماااااا هااااااي شنوووو
_ عفيه لازم اروح للدكتوره بس اخاف اكوللهم نرمان شلون
_ شنو تخافين امشي خل ياخذوج للمستشفى لتموتين
_ اخاااف يرجعون يضربوني
_ اسكتي اني راح اطلع اشوف نزار واكله ياخذج فاروق مجلوب ميتحاجه .. طلعت من المطبخ اشرت النزار يجي
نزار : ها شتريدين
نرمان : ماعرفت شحجي ضليت صافنه بوجه
نزار : هااا بشري
نرمان : لازم تاخذ نجاة للمستشفى جاي تنزف .. مادري شلون طلعت مني .. شفته يباوع على نجاة بخوف ارتبك وكال لبسي حجابج وتعالي
_ بسرعه لبست وطلعت ورا راح وياهم كمال ومرته اسراء طب فاروق الغرفته وركع الباب ضليت بالهول وحدي مينطيني كلبي انزل قررت اطب اتفقده واروح
_ طبيت امشي بالممر على اطراف فتحت الباب على كيفي الغرفة ضلمه بيها ضوه خافت طاب من الشباك انتبهت عليه بملابسه الداخليه نايم والكانونه متحركه وطالع من ايده دم نازله منها قطرات على بطنه تقربت عليه تلمست وجها يطلع نار والغرفة بوخة دغيته بجتفه
_ عمو تسمعني .. انكلب واسمعه يون
_ انته مصخن لازم تكوم تسبح .. ماحسيت غير حط ايده على خصري وسحبني انكلبت على وجهي فوكا دفعت ايده وابتعدت عنا سمعته يحجي
_ نرماان تعااالي يمي لتعوفيني
_ تقربت عليه لزمت ايده لا ماعوفك .. قرفص وكام يرجف ويكرر لاتعوفيني ..
يتبع ....