_ عمو تسمعني .. انكلب واسمعه يون
_ انته مصخن لازم تكوم تسبح .. ماحسيت غير حط ايده على خصري وسحبني انكلبت على وجهي فوكا دفعت ايده وابتعدت عنا سمعته يحجي
_ نرماان تعااالي يمي لتعوفيني
_ تقربت عليه لزمت ايده لا ماعوفك .. قرفص وكام يرجف ويكرر لاتعوفيني ..
" ضليت كاعده واسمعه يهلوس بكلمات ممفهومه ماعرفت شسوي جبت مي بارد ورجعت اسويله كمادات عليت البنكه لان الجو بارد مو مال سبلت فتح عينه بثكل كام يردد
_ بارده ، بارده ، رجعت طفيت البنكه وغطيته زين .. صاح
_ بعد اريد غطه
_ كمت فتحت الكنتور وطلعتله غطه ثاني هم حطيته فوكا نصيت عليه
_ عمو شلونك هسه .. ماحسيت غير سحبني من ملابسي وحجه بصوت يرجف
_ ضلي يمي
_ اءء لا عمو اريد انزل .. شفته رجع غمض انقهرت اعوفه كعدت بالكاع بصفه واباوع على جف ايده نازل منها قطرات دم يابسه حطيت مي باصبعي وكمت امسح بي قربت ايده وبستها بخفه سرحت بملامحه المرسومه وشعره الاسود الكثيف وريحته الطاغيه بجو الغرفه
" قاطع افكاري صوت الاذان اتذكرت سوره المزمل كال اقراها للعافيه كمت توضيت وصليت الفجر شلت القران من يم راسه وكعدت اقرا وانفخ بوجها اخر مرا قريتها جاي نفخ فتح عينه يرمش حجه بصوت مبحوح
_شتسوين
_ اقرالك سوره المزمل
_ غمض عينه بثكل .. وليش تنفخين بوجهي
_ ابتسمت .. حته الايه توصل من حلكي الك
_ كام يضحك ويفر براسه .. خرب يومج والله ضحكتيني حته مفعولها يوصل اسرع
_ فرحت من شفته يضحك .. اي
_ كرص خشمي .. والله لانعل ابو شكلج "
_ شكد اتنرفز من هاي الجمله بس ضليت مبتسمه المهم هوا مابي شي
_ ليش كاعده بالكاع كومي يمي على الجربايه كعدي _ لا مرتاحه هيج
_ نجاة وين شلون صارت
_ راحت للمستشفى ويا نزار وكمال .. رفع راسه يباوعلي بقلق
_ ليش شبيها
_ اءء عمو مريضه
_ رفع نفسه وفتح مبايله اتصل وفتحه سبيكر دنك ويضرب باصابيعه بطرف الجربايه منتضره يرد رجع يدك مرا ثانيه قريب مينسد جاوبه
_ الووو وين انتو
نزار : بمستشفى **** الاهليه نجاة صاير عدها نزيف وتكول دكتوره يرادلها عمليه كركاش
حكيم : كرداش ؟ ليش هيا بيا شهر
نزار : ماعرف .. ولازم توقيع ال**** فلاح عاد فضيتها وقعت بمكانه
حكيم : وهسه هيا وين
نزار : بعدهم ما مطلعيها
حكيم : انتضرو اني جايكم .. سديت المبايل وكمت بسرعه بدلت واخذت سويجي
نرمان : الله عليك اخذني وياك اشوفها
_ نرمان امشي نزلي بغرفتج بس فاروق بالبيت ومن نجي اني ابلغج حته تجين تشوفين نجاة
_ تنهدت ونزلت ويا صعد بسيارته وراح طبيت من باب المطبخ شفت روان جاي تترس مي
روان : شلون صارت نجاة
نرمان : عبرتها وطبيت للغرفه لان لو مهتمه جان صعدت شافتها ضليت كاعده للصبح ادعي النجاة واسبح الله يسهل عليها صارت ساعه 7 الصبح لبست وطلعت كعدت بالدرج شويه وطلع فاروق يدخن يعني هوا هم منايم
فاروق : شعندج هنا كاعده
نرمان : انتضر نجاة خطيه سولها عمليه .. هز راسه وطفه الجكاره وشعل وحده ثانيه ضل واكف يعاين على الحديقه
_انفتحت الباب وطبت سياره حكيم وكمال كمت اركض عليهم حكيم نزل نجاة من السياره بس شفته بهتت ملامحي تون وتبجي بصوت مخيف لزموها من جتافه يمشوها
نجاة : اااااااه راح امووووت بطنييييي اااااااااه يماااااا لحكيني اااااااه
حكيم : اششش اهدي .. شلتها وصعدتها الدرج نيمتها بغرفة فاروق ونزار
نرمان : عمو شبيها ليش هيج بطنها توجعا كمت ارجف من شفتها جفونها مورمه وبس فاتحه حلكه وتون
حكيم : الك*** يد مسويلهيا بدون بنج عام
نرمان : ضربت صدري بخوف يمااااا ليش هيج الله لا يوفقهم
حكيم : انته مطي غير تسئل البنج مال عمليه شنو
نزار : هيه عمليه شمدريني ميبنجوها اعلم الغيب
نرمان : اباوع على فاروق ساكت ويباوعلها عيونه حمر عرفته يبجي عليها مادري ليش هيج يعاملها وهوا يحبها
حكيم : امشو خل نطلع خلوها ترتاح
نجاة : لااا لتعوفوني وحدي ضلو يمي
_ رجعو كعدو يمها كام حكيم يلعب بشعرها .. بجت ولزمت ايده تبوس بيها
نجاة : سامحني حكيم ابوس ايدك اني غلطت استاهل كل الصار بيه
حكيم : طبطبت على ايدها اهدي مو هسه نحجي
فاروق : لا هسه نحجي ليييش ضربج اريد اعرف
حكيم : سد الموضوع
فاروق : ما اسده ترا مثل ما اختك اختي
نجاة : بجيت وصحت .. لان ميريد الطفل ومرته هم متريده اني ما مزوجه فلاح مزوجه سهى هيا الامر النهاي عني وعنه .. الف مرا كتله ابني ما اموته هاذه اول طفل اليه اول فرحه تقر عيني والقران وراسكم انتو الما احلف بي جذب لا اجاوزت عليه ولا فتحت حلكي اجه الضهر تغده وطب نام بغرفه مرته طب بليل
قبل يومان
نجاة : سبحت وطلعت امشط بشعري طب فلاح بليل عاقد حاجبه وبيده سبحه يفر بيها
فلاح : حضري روحج باجر اذبين الطفل
_ شلون اذبه اصلا ولا دكتوره تقبل تجهض طفل
_ وانتي شمدريج
_ خابرت دكتوره وسئلتها ورفضت رفض قاطع .. حجيت هيج بلكت الله يشيل الفكره من راسه
_ اي لعد باجر الصبح سهى كالت اجيبلها ابره من بت خالتي صيدلانيه تضربها ويصير عندج نزيف اخذج للمستشفى يذبو
_ تخبلت من سمعت حجيه .. ياسهى يا ابره انته شتحجي فلاح ابني ما اذبه لو تنكلب الدنيا شذنبي اني انته عندك جهال ثنين تريد اضل عمري كله عاكر علمود حضرتك شبعان خلفه حجيت هيج ورجعت امشط شعري
_ اباوعله بالمرايه ابتسم بخبث وكام سحبني الحضنه شمرني على الجربايه وتقرب مني بحنيه وهدوء ابتعد وراح للحمام بدون ميكول ولا كلمه سبح وطلع ضليت صافنه على تصرفه كلش انقهرت من موخر بهل طريقه
" كمت سبحت وطلع شغلت تدفئه ونمت للصبح سمعت الباب تندك حيل اووووف منو بهل صباحيات
سهى : شنو العروس بعدها نايمه لازم تختختي البارحه
نجاة : فتحت الباب وكفت .. خيررر شتردييين ساعه 9 شكووو .. طلعت ابره كبالي وتخصرت تضحك
_ يلا حبيبه حته تلحكين اضربيها وراح نومه طويله بالمستشفى
_ النومه الج ان شاءلله جاي اسد الباب دفعتها وطبت لزمت ثوبي جرتني منا كمت اصيح ادفعا عندي ماشوف غير فلاح طب وراها
فلاح : حسج بت الكلب انعل ابوج لابو الجابج عليه
نجاة : وخرررروووو عنيييييي الله لا يوفقكم يا جلاااااااااب ماحسيت غير هيا لازمتني وهوا يدفر بطني وبضهري علما طك شي جواي لزمت اسفل بطني بوجع وكعدت بالكاع اصرخ لااااا فلااااااح عليك الله برررروح ابووووك عوووووفني فلاااااح رااااااااح اموووووووت
_ عافني وكعد على السرير يتنفس بسرعه .. بت الجلب كومي اخذي سلاباتج وروحي لك*** يدج خل يربوج ويعلموج الاصول وتعاليلي عود
نجاة : كمت اصرخ من الوجع كمت انتجي على الميز اريد اوصل للحمام طبيت اني سامعه من اصيله الي تفتح رجلها و تكعد مكنبصه عدها وجع لو اجيب لو يوكع الطفل سويت مثل ما اذكر ماحسيت غير مثل الشحم مدمه كام يوكع مني عصرت ثوبي ابجي والوجع موتني طلعت من الحمام بلكت يسعفني
فلاح : يلا لبسي عباتج خل اخوتج الكو*** يحيرون بيج
_ انصدمت بي صدمه عمري .. اذيته بالكلام طغت على وجع جسمي حطيت عباتي على راسي وصلتي باب البيت
_ يلا نزلي ولي واني عندي حجي ويا اخوتج وابوج الشيخ جر الحجايه باستهزاء نزلت من السياره طبيت للبيت تلكاني الحارس وصعد فوك اوون من الالم
فاروق : من كلتلكم ي**** ماصدكتوني اذا ما انبش ابو بكبره
حكيم : ممنوع تصرف بشي بدون علمي اليوم اصير كعده وخلي الحك ويانه خلينه كاسرين عينه
_ سكت وطلع من الغرفه سمعنه ركت الباب مال البيت
نزار : معليج بي هاذه مخبل احنه ناخذ حكج من عينه وداعتج
نجاة : برطمت .. عندي وجع نزار
حكيم : كمت طلعت واشرت النرمان تجي ورايه
_ ها عمو
_ تعرفين اسوين شوربه
_ اي اعرف اسوي مال عدس
_ بلا أمر عليج اسويلها شوربه واني راح اجيبلها معلاك وتمر لان خسرت دم وعدها علاج
_ لا عمو انته مو تئمر انته على عيني وراسي صدك تحجي لو تطلب روحي انطيكياها
_ حطيت ايدي على راسها بامتنان يله استعجلي بين ما اروح واجي
نرمان : طبيت للمطبخ سويت شوربه قريب ما تخلص طب بيده كومه علاليك اخذتهن منا .. الله يساعدك
_ ويساعدج ابويه خلصتي
_ اي بس تثخن شويه واطفيها
_ عاشت ايدج طلعي المسواك وجبت لفات مال معلاك النه كلنه حطيهن بصينيه وتعاي
_ سويت مثل ما كال وجهزت صينيه وطببت للغرفه شفت نزار يشاقه ويا نجاة ويضحكها
نزار : يعني هسه متكليلي الكرداش شلون سولجيا
نجاة : بابتسامه لا ما اكلك
حكيم : شكد مستهتر روح افتحلك كتاب اقرى
نزار : يمعود الدراسه لو تفيد جان فادت اهل الكبور
نجاة : القصيده للطالب المسحول نزار فاضل موو
حكيم : رحم الله والديج يلا كافي كومو اكلو رفعت نجاة من ضهرها عدلتها شلت الطاسه وكمت اوكلها شوربه .. طيبه ؟
نجاة : تخبل
حكيم : يابه هاي نونو ام البيت سوتها موعيب تطلع موطيبه
نرمان : ابتسمت بفخر وكمت اكل واباوع على منضرهم شلون حلو يهتم بنجاة شكد كلبه حنين هل حكيم
نزار : يابه انطوني خاشوكه خل اوكلها مو طكها الجفاف
نرمان : اشرت على نفسي اني ؟
نزار : لا امي نرمان يو ار اسد ؟
الكل : هههههههههههههههههه
نرمان : لا جلب
_ ضلينه كاعدين للعصر يمها نسولف ونضحك وياها حته تنسه كمت اوديها للحمام وعمو يصر اطب وياها و اندار لان متكدر وحدها تكول عندي وجع طلعته من الحمام وديتها للسرير
حكيم : بدلت واخذت سويجي للعصر اجو عمامي ولدهم والتم الفخذ مالتنه خابرت فاروق اجه طبينه للديوان ويا ابوي ونجم وكمال ونزار جانت كلها حاضره بدت ناس ترفع وناس تكبس
فاروق : اذا انته مو زلمه ومو حمل مسئوليه زواج ثاني وخلفه ليشششش ازوجت
فلاح : من البدايه كلت ماريد خلفه عندي جهال واختكم اجاوزت عليه اني مو نيتي اضربها بس هيه جبرتني
حكيم : يابه نعتذر منك هيه اجاوزت وجبرتك تضربها زززين والابره ؟ وبت خالت مرتك الي تريد اطرحها ؟ انته تدري اني هاي الكعده سويتها علمودك لطفا بيك والا اني اكدر اروح ارفع دعوه عليك وعندي ادله كامله واول وحده اسجنها مرتك وبت خالتها وانوب انته وياهن يحطوك .. بس احترمت الزاد والملح الي انته ماحسبتله حساب يعني هسه اني مسوي فضل براسك لو لا
فلاح : اذا هيج الحجي صار مثل ما دخلنه بالمعروف نطلع بالمعروف
حكيم : يله طلك
فلاح : يتلفت يمنا ويسرى .. ارفعو قضيه عليه واطلكها
حكيم : افااااا يبن عمي ليش تريد رضيعتي ترفع عليك دعوه ؟
فلاح : غير هاذه الحجي ماعندي
طرف ثاني : يابه صلو على محمد مو هيج تنحل ماكو رجال ميضرب مرته والمرا لازم تتحمل شني اول وحيده اخر وحيده وحك هاذه المي اليغسل الحي والميت المرا عندي بالبيت افكس عيونها وماتحجي
فاروق : عمي اختنه ماطالعه من زرف الحايط وكلمن ابخص بهله
فلاح : خل تتنازل عن الحاضر والغايب واطلكها انه ماعندي سويتلها عرس تحجي بي البصره
نزار : عرسيش ولك لوما احنه عشيناك بالحنه
طرف ثاني : عيب بويه من تحجي الكبار الصغار يسكتون
نزار : يا صغار عمي انه رجال حقوقي اذا ماتعرفني
فاروق : دغيته لتمضرط مو وكتها
حكيم : شوف فلاح هاي كدام الوادم اطلك ورجلك فوك راسك واشلع حقوق نجاة من عيونك واذا ما سويت الي اكلك عليه الك رب والي رب
فلاح : اطلكها بس اصبرون عليا لان ماعندي ولا فلس
حكيم : فضت الكعده وكلمن رجع البيته ..
فاضل : ا ار اريد اش اشوف نجاة
نزار : اني اصعدك دفعته بالعربانه بس درج ما اكدر اصعده اجه فاروق ساعدني وصعدنا فوك طببنا الغرفت نجاة جانت كاعده تبجي بس شافت ابوي كامت من مكانها باست راسه
فاضل : دمعت عيونه ورفع اصبعه اليرجف .. والله و و والله اخذلج ح حقج منه
نجاة : حضنته جنت بهاي الحضه محتاجه حضن حتلو من عدوي رغم اني مشايفه منه حنيه هاي اول مرا
حكيم : نسصيت على الكرسي مالته اليوم اضل ويانه تتعشه .. هز راسه اي "
نزار : التفتت شفت نرمان تبجي وتباوع عليهم ردت اكول لبوي يحضنها بس خاف ينعجب بيها وياخذها مالنه خلك هوا ضعيف امام هيج اعمار
نرمان : حسيت نفسي محتاجه نفس حضن نجاة من ابويه اتمنيت لو عايش جان كل هل تعب ماشفته باوعت على عمو حكيم بس جان هوا هم ماشفته مسحت دمعتي ورحت للمطبخ كعدت خلي ياخذون راحتهم همه عائله اني شكو بنصهم .. شويه ودخل عمو
_ ها بابا ليش كاعده هنا وحدج
_ لا هيج ماكو شي بس كلت اعوفكم براحتكم
_ ضحك مستهزء شنو انتي راح اضايقينه مثلا
_ مارديت كمت اعدل بحجابي مجاعله نضراته الغريبه شويه واجه سحبني من ايدي للغرفه طب وسد الباب
_ شبيج ؟ ليش تبجين
_ اوووف شكد تسئلني شبيج
_ وشنو معاجبتج ؟ اكو ناس تتحسر على هاي الكلمه تتحسر على واحد يسئلها شبيج بس الضاهر انتي متعافيه
_ اوكف عمو زعلت
_ لا مازعلت بس قبل لا تحجين فكري " لسانك حصانك ان صنته صانك ان خنته خانك "
_ زين هسه شسوي وانته اضوج من الائسف والاعتذار
_ تريدين حضن ؟
_ ارتبكت من حجايته اكيد عباله ابجي على الحضن .. لا لا عمو ماريد
_ متأكده
_ اي متأكده
_ هواي لو شويه
_ شنوه ؟
_ متأكده
_ ضحكت يوو سوالفك عمو سامحني يلا راح اطلع فتحت الباب وطلعت
" مرت الايام ونجاة صارت احسن رجعت الدوامي وكل يوم ارجع الكه نجاة مسويتلنه طبخه شكل ونلتم كلنه بس بليل انزل انام جوه وكلما اطب واطلع اسمع حجي من عمتي واتعلمت على هل موال بيوم وصلني فاروق للمدرسه لان عمو سافر البغداد طبيت للبيت اريد ابدل واصعد يم نجاة
اصيله : هلاااا والله همزين زرتي المك*ب خانه مالتنه
نرمان : عمه فدوه تعبانه بس ابدل واطلع اكعد استمعلج
اصيله : كامت اطك اصبعتين وتهز بركبتها .. ايييي ايييي اني الج بت عماد
نرمان : طبيت للغرفه كلبي مقبوض اخاف صدك اسويلي شي طبيت للحمام سبحت وبدلت وصعدت يم نجاة شفته تكرز حب ويا نزار ويتفلونه بالكاع عطت بيهم
_ ادري هااااي ليش لان المسح عليه هيج اسون
نزار : هيج الحب يصير طعمه اطيب
نرمان : ايييع
نجاة : تعاي هاج شلت صم مال حب وحطيته بحضنها
نرمان : كعدت اكرز وياهم على الواهس
نجاة : والقران روحي طالعه لا مبايل ولا طلعه ولا طبه
نرمان : ليش مبايلج وين
نجاة : حكيم اخذه مني يكول هل فتره ارتاحي من كلشي مارسي الحياة الطبيعيه
نزار : ميدري الحياة جاي تمارس بينه
نجاة : كفخته انجب ولك منا لبنيه
نزار : موقصدي وجع علساس انتي مرا ام الكركاش
نرمان : اهو راح يتكافشون .. ضلينه على هيج نمط صرت اقره واكل كله هنا على واهس نجاة مر شهر على وجودها هنا وهل مرا عمو اتئخر بسفرته وكلبي طك على شوفته بيوم جنت ماقاريه امتحاني ناسيه
_ داومت وماعرفت اجاوب بالامتحان انقهرت كلش طلعت من المدرسه واشوف عمو واكف بصف سيارته مجتف ويباوعلي رحت اهرول للسياره بس ماحضنته رغم حنيني اله صعدت بالسياره
_ شلونك عمو ليش هلكد غبت عني
_ لو بيدي والله ماعوفكم بس شغلي هاذه
_ حباب لتروح بعد هلكد مو كلبي طك عليك .. انتبهتله يباوعلي بنضره بيها ابتسامه غريبه
_ جر نفس من جكارته ونفضها اني هم كلبي طك عليج .. احم اي شلونه الدراسه
_ زفت اليوم سلمت ورقتي فارغه .. التفتعليه عاقد حاجبه
_ ليش
_ ماقريت
_ حقج حقج ملتهيه بسوالف الطايحضها اكل ونوم وسوالف وحش بالعالم ويا نجاة بس نرجع للبيت حته مبايلج اخذه واكعد اقريج وباجر تمتحنين من جديد
_ متقبل تعيده
_ غصبا ما على ابوها تعيده
نرمان : رجعنه للبيت بس طبينه تلكتنه نجاة حضنها وبوسها صبت غده وكعدنه اكلنا وطب نام للعصر كعد
حكيم : جيبي كتبج وتعالي
نجاة : وين تعال قريها هنا يمي ضايجه
حكيم : راح اقريها ما اخذها للمنتزه .. يلا كومي هناك تركزين اكثر
نجاة : تنهدت كووومي نونو كووومي هناك تركزين اكثر
نرمان : ضحكت على حركات نجاة تعوج بحلكه اخذت كتبي وطبيت للغرفه ورا كعد وحط صونده بصفه بلعت ريكي بخوف جر مني الكتاب وكعد يشرح
حكيم : جاي تفتهمين عليه مو
نرمان : اي
حكيم : شجاي اكول
نرمان : شو عيد
حكيم : جريت الصونده .. اعيد ؟
نرمان : لا لا لتعيد كافي حفظته
حكيم : ولج فصمه اضحكين عليه انتي ضربته بالصونده بخفه على ايدها
نرمان : ههههههههههه متوجع
حكيم : مو اخليها توجع
نرمان : لا يله خل نكمل شرح مو مال شقه هسه عندي امتحان باجر
حكيم : ضحكت .. استغفرلله انتي وتالي وياج
نرمان : كمل عمو كمل لضيع وكتنه الوكت ثمين
حكيم : ايبااااخ صفيناز هسه يلا عرفتي ثمين
نرمان : انحرجت وكمت ابلعم .. ابتسم ورجع يشرح بحدود الساعتين حشه الفصل براسي تحشا كمت طلعت يم نجاة .. لحكيني شوا على اذاني بصل
نجاة : حيييل همزين ماعندي لا مدرسه ولا امنتحانات يما اني للخامس وكلت حقي برئبتي رادو عالجو وياي مارضيت اكمل
نرمان : احسلج
حكيم : عطت بيهن هاذه حال الفاشلات من يلتقن
نرمان : سكتنه .. صدك ثاني يوم وصلني وطب وياي للمدرسه بس طلب منهم يعيدون الامتحان مباشرا وافقو هاي لو اني كايلتله جان لعبن لعب بيه طلع وامتحنت مال البارحه واليوم وطلعت من المدرسه جان اخر امتحان الي وعطلنه نصف السنه رجعت للبيت منتعشه بدلت وطلعت من الغرفه مسرسحه من الفرحه شفت عمه اصيله متخوصره واكفه .. عبرتها وصعدت فوك لكيت عمو كاعد
_ ها تغديتو بدوني اليوم جان انتضرتوني .. اشرتلي نجاة اسكت ماعرفت شكو باوعت على عمو الي العرك يزخ منه والدنيا بارده رفع عينه خازرني .. شكو شبيكم
حكيم : انطيني مبايلج نرمان
نرمان : بدون تردد انطيتهيا استغربت تصرفه .. ضل يكلب بي ساعه كمت الوب اخر شي حطه بصفه ورجع يلعب بمبايله فتح صوره الي بمكالمه فيديو فاتحه كامرا ويا واحد مغطي وجها بس لحيته مبينه فتحت عيني على وسعها ولطمت على صدري وال قبل ما اكمل الحجايه صفكني راشدي ..
يتبع ....